Трамп маъмурияти қарийб 76 минг мексикаликни АҚШдан қувди

АҚШ Президенти Дональд Трамп жорий йилнинг январида лавозимига киришганидан бери деярли 76 минг мексикалик фуқаролар АҚШдан ватанига депортация қилинди. Бу ҳақда Мексика Ички ишлар вазири Роса Исела Родригес маълум қилди.

“20 январдан ҳозиргача биз АҚШдан депортация қилинган 75 900 дан ортиқ ватандошларимизни қабул қилдик, улардан 13 978 нафари ҳаво йўли орқали етиб келди”, деди Родригес.

Вазир “Мексика қучоғини очади” деб номланган ҳукумат стратегиясининг оралиқ натижаларини тақдим этди. Бу дастур депортация қилинган мексикаликларни қабул қилишга қаратилган бўлиб, 34 та федерал идора ва ҳудудий бошқарув органлари иштирокида мувофиқлаштирилмоқда.

Чегара ҳудудлар – Қуйи Калифорния, Сонора, Чиуауа, Коауила, Нуэво-Леон ва Тамаулипас штатларида жами 25 минг кишини қабул қила оладиган мигрантларни қабул қилиш марказлари ташкил этилган. Жорий йилнинг январь ойидан бери бу марказлар орқали 36 мингдан ортиқ депортация қилинган шахслар ўтган.

“Биз Мудофаа вазирлиги ва Ҳарбий-денгиз кучлари саъй-ҳаракатлари туфайли 145 900 дан ортиқ овқат тарқатдик, 13 800 тиббий ва 5300 психологик маслаҳат хизматларини кўрсатдик”, дейди Родригес.

Депортация қилинганларга ватанга қайтганидан сўнг юридик ва тиббий ёрдам, гендер зўравонлиги масалалари бўйича маслаҳатлар кўрсатилган, 9 мингдан ортиқ туғилганлик ҳақидаги гувоҳномалар берилган, 50 мингдан зиёд киши ижтимоий суғурта тизимида рўйхатга олинган.

“Мексика қучоғини очади” дастури ватанига қайтганларга иш топишда ёрдам бериш, ижтимоий имтиёзлар бериш ва 100 долларлик бир марталик тўловни назарда тутади.

Эслатиб ўтамиз, аввалроқ Қўшма Штатлар Меҳнат статистикаси бюроси маълумотларига таяниб, АҚШ Миграция тадқиқот маркази мустақил илмий-тадқиқот ташкилоти Дональд Трамп жорий йилнинг бошида мамлакатдаги ноқонуний мигрантларга қарши курашни бошлагач, уларнинг сони деярли бир миллионга камайгани хабар қилинганди.