Трамп Колумбия Президентини Оқ уйга таклиф қилди

АҚШ Президенти Дональд Трамп Колумбияга нисбатан ҳарбий чоралар кўриш билан таҳдид қилганидан бир неча кун ўтиб, кеча, 7-январда Колумбия Президенти Густаво Петро билан телефон орқали суҳбатлашгани ва уни Оқ уйга таклиф қилганини маълум қилди. Бу ҳақда у Truth Social ижтимоий тармоғида ёзди.  

Қайд этилишича, Трамп ва Петро суҳбатда икки давлат ўртасидаги муносабатларни муҳокама қилган. Бу уларнинг илк суҳбати  бўлиб, мулоқот Трамп 4 январь куни Колумбия ҳукуматига қарши АҚШ ҳарбий амалиётини ўтказиш “яхши фикр” эканлигини айтганидан кейин бўлиб ўтди. Ушбу таҳдид Трампнинг қўшни Венесуэла президенти Николас Мадурони АҚШ ҳарбийлари томонидан қўлга олиниши ва Манҳеттенга олиб кетилиши ортидан янграган эди. 

“Колумбия Президенти Густаво Петро билан гаплашиш мен учун катта шараф бўлди. Суҳбат чоғида гиёҳванд моддалар ва ўртамизда юзага келган бошқа келишмовчиликларга ойдинлик киритилди. Мен унинг қўнғироғи ва суҳбат оҳангини юқори баҳолайман ҳамда яқин келажакда у билан учрашишни
интиқлик билан кутаман”, деб ёзди Трамп ўзининг ижтимоий тармоғида.  

Оқ уй раҳбарининг айтишича, Вашингтонда учрашувни ташкил этиш ишлари бошланган, бироқ аниқ сана очиқланмаган. 

“Reuters”га кўра, Колумбия етакчиси Боготада ўтказилган митингда чиқиш қилиб, президент бўлганидан буён Трамп билан  илк бор телефон орқали гаплашганини ва икки мамлакат ўртасида муносабатларни қайта тиклашни сўраганини айтган. Шунингдек, у қўнғироқ “самимий ва ҳурматга асосланган” тарзда ўтганини маълум қилган.  

Эслатиб ўтамиз, Трамп 2025-йил январида Оқ уйга қайтганидан бери унинг Петро билан муносабатлари совуқ бўлиб келмоқда.  https://qalampir.uz/news/men-tramp-bilan-k-ul-berib-kurishmayman-kolumbiya-prezidenti-113412   АҚШ Президенти Колумбия ҳукуматини асоссиз равишда АҚШга “кокаин” оқимига кўз юмишда айблаб келган. Бундан ташқари, октябрь ойида Петрога нисбатан санкциялар ҳам жорий этилган.  

Шунингдек, сентябрь ойида Петро АҚШда бўлиб ўтган Фаластинни қўллаб-қувватлаш намойишида қатнашгани ва АҚШ аскарларини Трамп буйруқларига бўйсунмасликка чақиргани ортидан унинг АҚШ визаси бекор қилинган эди.  

Петро ҳам, ўз навбатида, Исроилнинг Ғазодаги ҳаракатларини очиқ танқид қилиб келган ва Трампни Ғазодаги “геноцидга шерикликда” айблаган. Шунингдек, у Кариб денгизи ҳудудида гиёҳванд моддаларни ташишда гумон қилинган кемаларга АҚШ томонидан ракета зарбалари берилиши юзасидан “жиноят иши қўзғатиш” зарурлигини таъкидлаган. 

“Reuters” маълумотига кўра, Трамп маъмурияти сентябрь ойидан буён гиёҳванд моддалар ташишда гумон қилинган кемаларга қарши 30 мартадан ортиқ зарба берган. Ушбу операциялар оқибатида камида 110 киши ҳалок бўлган.