Tramp bilan bog‘liq mojaro fonida BBC'ning yana bir rahbari iste’foga chiqdi

BBC boshqaruv kengashining a’zosi Shumit Banerji iste’foga chiqdi. Bu haqda BBC xabar berdi.

Qayd etilganicha, Shumit Banerji to‘rt yillik muddati tugashidan bir necha hafta oldin iste’foga chiqqan. U iste’foga chiqish xatida tashkilotdagi boshqaruv muammolariga norozi ekanini bildirgan va bosh direktor Tim Deyvi hamda BBC News bosh ijrochi direktori Debora Ternessning kutilmaganda iste’foga chiqishi jarayonida u bilan maslahatlashilmaganini aytgan.

Iste’fo BBC uchun qiyin bir paytda sodir bo‘ldi. Avvalroq, 2021 yildagi Donald Trampning nutqini tahrir qilgan Panorama dasturi tufayli BBC tanqid ostida qolgan va shu sababli Deyvi va Terness iste’foga chiqqan. Tahrirlangan lavhalar Trampning “zo‘ravonlikka chaqirgan” degan taassurotni uyg‘otgan, BBC esa buning noto‘g‘ri ekanini tan olgan va uzr so‘ragan, ammo moliyaviy kompensatsiya talabini rad etgan.

Banerji kengashdagi roli davomida BBC mustaqilligini himoya qilish va jamoat manfaatini ta’minlash uchun javobgar edi. Uning iste’fosiga asosiy sababi kengash raisi Samir Shoh va boshqa a’zolarni tanqid qilgani bo‘ldi.

Ma’lumot uchun, Shumit Banerji 2022 yildan beri BBC boshqaruv kengashining ijro etuvchi bo‘lmagan direktori bo‘lib kelgan. Uning kengashdagi vazifasi BBC mustaqilligini himoya qilish va jamoat manfaatini ta’minlashdan iborat edi. 

Eslatib o‘tamiz, avvalroq Tramp BBC’dan 5 mlrd dollargacha kompensatsiya undirmoqchi ekani ma’lum qilingan.