Трамп АҚШда ўнлаб янги ядровий реактор қуришни буюрди

АҚШ Президенти Дональд Трамп кеча, 23 май куни АҚШда атом энергиясидан фойдаланишни сезиларли даражада кенгайтиришга қаратилган тўртта фармонни имзолади. Бу ҳақда Оқ уй хабар берди.

Фармонлардан бири Ядровий тартибга солиш комиссиясининг радиация таъсирининг мақбул даражаларига ҳаддан ташқари эҳтиёткорлик билан муносабатда бўлиш-бўлмаслигини баҳолашни талаб қилади.

“Трампнинг фармойишлари, шунингдек, комиссиядан 18 ой ичида ядровий реактор қурилишини тасдиқлашни талаб қилиши кутилмоқда, бу эса одатда йиллар давом этадиган жараённи тезлаштиради”, деб ёзади “The Hill”.

Трамп томонидан имзоланган яна бир ҳужжат энергетика ва мудофаа департаментларига федерал ерларда ядровий реакторлар қуриш имконини беради, бу эса ядро энергиясидан мудофаа эҳтиёжлари ва сунъий интеллект операциялари учун фойдаланиш имконини беради.

Трамп бу соҳада Хитой ва Россияга қарамликдан қутулиш учун АҚШда уран қазиб олиш ва бойитишни ҳам кенгайтириш ниятида.

“Reuters”нинг ёзишича, Трамп маъмурияти сунъий интеллектнинг ривожланиши туфайли ўн йилликлар ичида биринчи марта электр энергиясига бўлган талабнинг ўсишига дуч келмоқда. Агентликнинг эслатишича, Трамп президентликка келган биринчи кунидаёқ миллий энергетика бўйича фавқулодда ҳолат эълон қилган.

АҚШ Энергетика вазири Крис Райтнинг айтишича, сунъий интеллект учун зарур бўлган янги энергия манбалари ва маълумотлар марказларини ишлаб чиқиш "Манхеттен лойиҳаси 2"га айланади (Иккинчи жаҳон уруши даврида АҚШнинг ядровий қурол яратиш бўйича кенг кўламли дастури).

Дональд Трамп АҚШ яна атом саноатида “ҳақиқий куч”га айланишни исташини айтди. Янги сиёсатнинг мақсади кейинги 25 йил ичида атом энергияси ишлаб чиқаришни тўрт баробарга оширишдир, деди Президент маслаҳатчиси.