Тошкентдаги “прописка” тизими шармандали эди – Содиқ Сафоев

Илгари Тошкент шаҳрида мавжуд бўлган “прописка” тизими шармандали эди. Бу ҳақда Сенат раисининг биринчи ўринбосари Содиқ Сафоев “Ўзбекистон 24” телеканалига берган интервьюсида тўхталди.

Содиқ Сафоев “Юзма-юз” лойиҳасида Янги Ўзбекистон – Янги Тошкентда амалга оширилаётган стратегик ўзгаришлар ҳақида гапирган. Асли тошкентлик бўлган Сафоев Тошкентнинг нечоғлик азимлигини, виқори, меҳмондўст халқи, такрорланмас шеваси ҳақида айтaр экан, шунга қарамай Тошкентда кўп йиллар давомида шаҳарсозлик ривожланмаганини айтган.

Тошкентда жамоатчилик транспортига эмас, балки шахсий автомобилларга эътибор қаратилганини ҳам эслаган. Сафоевнинг айтишича, бир пайтлар Тошкент шаҳри одамлар учун мўлжалланган эмас, балки автомобиллар учун мўлжалланган ҳолатга келиб қолган. Буларнинг асосий сабаблардан бири прописка тизимининг қаттиқ режими бўлган. Одамлар “прописка” масаласидан нақадар қийналганини ҳам алоҳида таъкидлаган. 

“Давлат раҳбарининг инсон ҳуқуқларини устувор қўйган сиёсати натижасида илгариги шармандали “прописка” тизими бекор қилинди. Бу нима дегани? Шу ватаннинг фарзанди бўла туриб, одамлар Тошкентда ўз хоҳиши билан яшай олмасди. Бу тақиқланган эди. Улар ишга жойлаша олмаган, рўйхатдан ўтказилмаган, ҳатто қонуний яшаш имкониятидан ҳам маҳрум қилинганди”, дейди сенатор.

Содиқ Сафоев суҳбат давомида, охирги йилларда жамоатчилик транспорти ривожланганини алоҳида эътироф этган. 

“Бугунги метро билан 10 йил олдинги метрони қиёслаб бўлмайди. Бугун кунига миллионлаб одамларга хизмат қиляпти. Лекин барибир булар Тошкентдаги иссиқлик энергияси, йўллар каби қатор муаммоларни ечишга ёрдам бермади. Шу сабабли, Янги Тошкент бунёд этилди” дейди сенатор.

Қайд этиш жоиз, қарийб 30 йил давомида Тошкентда доимий прописка олиш ҳуқуқи кескин чеклаб келинган. 2020 йил апрель ойида Президент фармони асосида қонунчиликка ўзгартириш киритилиб, мазкур чекловлар бекор қилинган.