Тошкентда технопарк ичидаги цех ёниб кетди 

Тошкент шаҳри Яккасарой туманидаги технопарк ҳудудида жойлашган ишлаб чиқариш цехида ёнғин содир бўлди. Бу ҳақда Фавқулодда вазиятлар вазирлиги хабар берди. 

Қайд этилишича, бугун, 1 сентябрь куни соат 16:26 да Қушбеги даҳасида жойлашган Яккасарой технопарки ҳудудидаги ишлаб чиқариш цехининг том ва ички қисмида тахминан 1000 квадрат метр майдонида ёнғин содир бўлган.

Шунга кўра, ёнғин-қутқарув экипажлари соат 16:31да ҳодиса жойига етиб борган ҳамда ёнғинни соат 17:29 да қуршаб олиб, соат 18:07 да бартараф этган.

Воқеа жойига Ўзбекистон Республикаси ФВВ раҳбарияти, Тошкент шаҳар ФВБ ва туман ФВ бўлими раҳбар ходимлари етиб борган.

Ёнғинни бартараф этишга 11 та ёнғин-қутқарув экипажи, 2 та махсус сув ташишга мўлжалланган (водовоз) автомобиль, 1 та қутқарув отряди экипажи жалб этилган. 

Ҳодиса оқибатида фуқароларнинг тан жароҳати олиши ва ҳалок бўлиши ҳолатлари тўғрисида хабар келиб тушмаган. Ҳозирда ёнғиннинг келиб чиқиш сабаби ва келтирилган моддий зарар миқдори аниқланмоқда.