Тошкентда тадбиркордан пул ундирмоқчи бўлган икки солиқ инспектори ушланди

Тошкент шаҳрида тадбиркорларга ёлғон гапириб, пул ишламоқчи бўлган амалдорларга нисбатан жиноят иши қўзғатилди. Бу ҳақда Давлат хавфсизлик хизмати хабар берди. 

Қайд этилишича, Тошкент шаҳар, Олмазор тумани Солиқ инспекциясининг икки нафар бош инспектори эшик ва ромлар ишлаб чиқарувчи оилавий корхонада текширув ўтказиб, гўёки корхона ҳар ойда кам миқдорда солиқ тўлаб келаётганини важ қилиб, тўланмаган солиқлар учун жарима қўлламаслик эвазига 10 млн сўм талаб қилган.

Давлат хавфсизлик хизматининг Тошкент шаҳар бўйича бошқармаси ҳамда Иқтисодий жиноятларга қарши курашиш департаменти ҳамкорлигида ўтказилган тезкор тадбирда солиқчилар сўралган пул маблағини олган вақтларида ашёвий далиллар билан ушланган.

Ҳозирда уларга нисбатан Жиноят кодексининг 210-моддаси (пора олиш) 2-қисми “в”, “г” бандлари билан жиноят иши қўзғатилиб, “қамоқ” эҳтиёт чораси қўлланилган. Тергов ҳаракатлари олиб борилмоқда.

Эслатиб ўтамиз, аввалроқ Тошкентда “гашиш” сотмоқчи бўлганлар Андижонда қўлга тушганди.