Тошкентда сентябрь ойида квартираларнинг ижара нархи яна ошди

Тошкентда жорий йилнинг сентябрь ойида ўртача таъмирланган хонадонлар учун ўртача ижара нархлари август ойига нисбатан 2,8 фоиз, тўлиқ таъмирланган хонадонлар учун эса 1,4 фоиз ошди. Бу ҳақда Макроиқтисодий ва ҳудудий тадқиқотлар институти таҳлилида келтирилган.

Ўртача таъмирланган уй-жойлар ижарасига талабнинг ошиши бўйича кутилмалар бундай уйларнинг ижара нархларига таъсир кўрсатди. Хусусан, 2024 йилнинг сентябрь ойида ўртача таъмирланган 1 хонали уйлар учун ўртача ижара нархи август ойидагига нисбатан 2,4 фоиз, 2 хонали уйлар учун 3,4 фоиз, 3 хонали уйлар учун 3,2 фоиз, 4 хонали уйлар учун эса 2,1 фоиз ошди.

Ўртача таъмирланган хонадонлар учун нисбатан арзон ижара нархлари Сергели (1 хонали – 291 доллар, 2 хонали – 363 доллар, 3 хонали – 403 доллар, 4 хонали - 463 доллар), Олмазор (1 хонали – 306 доллар, 2 хонали – 362 доллар, 3 хонали – 426 доллар, 4 хонали – 503 доллар) туманларида таклиф этилган бўлса, энг қиммат ижара нархлари Миробод (1 хонали – 358 доллар, 2 хонали – 445 доллар, 3 хонали – 548 доллар, 4 хонали – 721 доллар) ва Яккасарой (1 хонали – 343 доллар, 2 хонали – 460 доллар, 3 хонали – 611 доллар, 4 хонали – 631 доллар) туманларида кузатилган.

Мазкур даврда тўлиқ таъмирланган 3 хонали уй-жойларнинг ижара нархи 0,9 фоиз пасайган бўлсада, 2 хонали уй-жойларнинг ижара нархи ўртача 1,1 фоиз, 4 хонали уй-жойларнинг ижара нархи 2,3 фоиз ҳамда 1 хонали уй-жойларнинг ижара нархи 3,1 фоиз ошган.

Тўлиқ таъмирланган уй-жойларнинг энг арзон ижара нархлари Сергели (1 хонали – 331 доллар, 2 хонали – 428 доллар, 3 хонали – 506 доллар, 4 хонали – 634 доллар) ва Учтепа (1 хонали – 393 доллар, 2 хонали – 453 доллар, 3 хонали – 538 доллар, 4 хонали – 717 доллар) туманларида, энг қиммат ижара нархлари эса Миробод (1 хонали – 474 доллар, 2 хонали – 678 доллар, 3 хонали – 967 доллар, 4 хонали – 1278 доллар) ва Шайхонтоҳур (1 хонали – 442 доллар, 2 хонали – 708 доллар, 3 хонали – 1004 доллар, 4 хонали – 1272 доллар) туманларида кузатилди.

Эслатиб ўтамиз, аввалроқ Тошкентда ўқув йили бошланиши билан уйларнинг ижара нархи ошганди. Таҳлилларга кўра, пойтахтда ёзнинг сўнгги ойида уй-жой ижарасининг ошиши кузатилиб, бунга бир нечта омиллар, жумладан, сентябрь ойидан олий таълим муассасаларида янги ўқув йилининг бошланиши бўйича кутилмалар таъсир кўрсатган.