Toshkentda noqonuniy sotilayotgan 5,6 tonna benzin aniqlandi 

Toshkent shahrida 5,6 tonna benzin yonilg‘isi noqonuniy muomalaga kiritilishining oldi olindi. Bu haqda Iqtisodiy jinoyatlarga qarshi kurashish departamenti axborot xizmati xabar berdi. 

Aniqlanishicha, mazkur holat Bosh prokuratura huzuridagi departamentning Toshkent shahar boshqarmasi tomonidan o‘tkazilgan tezkor tadbirlarda aniqlangan. Unga ko‘ra, 13 nafar fuqaro yong‘in xavfsizligi qoidalarini buzgan holda, noqonuniy daromad orttirish maqsadida AI-80, AI-95, AI-92 markali benzin yonilg‘isini qimmat narxlarda chakana sotish bilan shug‘ullanib kelgan. Ulardan jami 5,6 tonna benzin yonilg‘isi ashyoviy dalil sifatida olingan. 

Mazkur holatlar yuzasidan tergovga qadar tekshiruv harakatlari olib borilmoqda.

Eslatib o‘tamiz, avvalroq Samarqand viloyati Paxtachi tumanida joylashgan issiqxonada 3 mlrd 300 mln so‘mlik gazdan noqonuniy foydalanilgani ma’lum bo‘lgandi.

Sarvar Xurramov