Тошкентда Lacetti ҳайдовчиси 6 пиёдани босиб кетди

Бугун, 4 декабрь куни Тошкентда Lacetti ҳайдовчиси йўл четида турган 6 кишини босиб кетди. Оқибатда 2 киши вафот этди. Бу ҳақда пойтахт Ички ишлар бош бошқармаси хабар берди.

Қайд этилишича, соат 06:15 да Учтепа туманида фуқаро Р.И. Lacetti машинасини бошқариб кетаётиб, А.А. бошқарувидаги Nexia-3 машинаси билан тўқнашиб кетган. Оқибатда Lacetti ҳайдовчиси олти нафар пиёдани босиб кетган. Сўнг йўл четида ҳаракатсиз турган М.В. бошқарувидаги Matiz машинасига бориб урилган.

ЙТҲ оқибатида Lacetti ҳайдовчиси ҳамда тўрт нафар пиёда турли даражадаги тан жароҳатлари билан Республика шошилинч тиббий ёрдам илмий марказига ётқизилган.

Шунингдек, икки нафар пиёда олган тан жароҳатлари оқибатида вафот этган. Дастлабки маълумотларга кўра, йўл транспорт ҳодисасига Lacetti ҳайдовчисининг тезликни меъёридан ошириб, руль бошқарувини йўқотгани сабаб бўлган.

Мазкур ҳолат юзасидан шаҳар ИИББ Тергов бошқармаси томонидан Жиноят кодекснинг 266-моддаси 3-қисми билан жиноят иши қўзгатилган. 

Ҳозирда тергов ҳаракатлари олиб борилмоқда.