Тошкентда эски автомобилларни trade-in орқали янгилаш тизими жорий этилади

Ўзбекистонда 2010 йилгача ишлаб чиқарилган ва экологик талабларга тўлиқ жавоб бермайдиган автомобилларни trade-in орқали янгилаш механизми йўлга қўйилади. Бу ҳақда Президент Шавкат Мирзиёевнинг кеча, 24 ноябрь куни қабул қилинган “Тошкент шаҳрида экологик вазиятни яхшилаш бўйича кечиктириб бўлмайдиган чора-тадбирлар тўғрисида”ги фармонида сўз боради.

Фармонда Тошкент шаҳрида транспортдан чиқадиган зарарли моддалар ҳажмини қисқартириш бўйича алоҳида чора-тадбирлар белгиланган.

Шу мақсадда “Ўзавтосаноат” АЖ ҳамда тегишли идораларга пойтахтда фойдаланилаётган, экологик меъёрларга жавоб бермайдиган ва 2010 йилгача ишлаб чиқарилган автомобилларни босқичма-босқич янгилашга қаратилган trade-in тизимини жорий этиш вазифаси юклатилмоқда. 

Мазкур тизим жорий этилиши натижасида пойтахт кўчаларида йиллар давомида ҳаракатланган, атроф-муҳитга кўпроқ зарар етказадиган эски автомобиллар ўрнини янги авлод, экологик тоза транспорт воситалари эгаллай бошлайди. Бу нафақат ҳайдовчиларга ўз машинасини янгилаш учун қўшимча имконият яратади, балки Тошкент осмонини тутун пардасидан халос этиб, шаҳар ҳавосини янада мусаффо ва соғлом қилишга хизмат қилиши кутилмоқда.

Эслатиб ўтамиз, Вазирлар Маҳкамасининг жорий йил 4 сентябрь куни қабул қилинган “Автомототранспорт воситалари учун рўйхатдан ўтказиш давлат рақами белгиларини бериш тартибини соддалаштириш чора-тадбирлари тўғрисида”ги қарори билан автомобиллардан атмосферага чиқаётган ифлослантирувчи моддаларни қисқартириш бўйича “Экологик транспорт” тизимини жорий этиш муддати 2026 йил 1 январга қадар ўзгартирилганди. Шундан бошлаб зарарлилик даражасига қараб автомобилларга яшил, сариқ ёки қизил стикер берилади.

Комила Қобилова