Тошкент вилоятида ҳоким ўринбосари пора билан қўлга тушди

Жамият 15083

Тошкент вилоятидаги туманлардан бирида ҳоким ўринбосари тадбиркорга ер ажратиш учун ундан пул олаётганда қўлга тушди. Бу ҳақда “Ўзбекистон 24” телеканали эфирида маълум қилинди. Дастурда ДХХ ва прокуратура органлари томонидан аниқланган бошқа коррупция ва фирибгарлик жиноятлари ҳақида ҳам маълумот берилди.

Тошкент вилоятида 60 минг долларга ер сотмоқчи бўлган туман ҳокими ўринбосари қўлга олинди

Тошкент вилояти туманларидан бирида ҳоким ўринбосари вазифасида ишловчи шахс тадбиркорлик билан шуғулланмоқчи бўлган фуқарога 10 гектар бўш ер майдонини 60 минг долларга сотиши ва тегишли ҳужжатларни расмийлаштириб беришини айтиб, ундан 25 минг доллар олаётган вақтида қўлга тушган.

Таъкидланишича, бундан бироз муқаддам ушбу мансабдор шахснинг жиноий алоқаси бўлган кимса ҳам 1 гектар унумдор ер майдонини 100 минг долларга сотаётганда ушланган.

Қайси туман ҳокимининг ўринбосари қўлга олингани, унинг исми хабарда келтирилмаган.

Ҳарбий қисм майори 3 минг доллар пора билан ушланди

Тошкент вилоятида жойлашган, Мудофаа вазирлиги тизимидаги ҳарбий қисмлардан бирида хизмат қилувчи майор унвонидаги ҳарбий хизматчи маҳаллий фуқародан шартнома асосида ҳақиқий ҳарбий хизматга қабул қилинишига ёрдам бериш эвазига 3 минг доллар олган вақтида қўлга олинган.

Дастлабки суриштирув ҳаракатлари давомида у муқаддам бошқа бир фуқарони шартнома асосида ҳақиқий ҳарбий хизматга чақирилиши учун ёрдам беришини ваъда қилиб, 700 доллар олгани ойдинлашган.

Майор унвонига эга офицернинг бундай ноқонуний хатти-ҳаракатларини амалга оширишида воситачилик қилган аёл ҳам тезкор тадбир давомида қўлга олинган.

Консерваторияга ўқишга кириш учун 5 минг доллар

Тошкентдаги Ўзбекистон давлат консерваторияси қошидаги Иқтидорли болалар академик лицейи катта ўқитувчиси ўзганинг ишончига кириб, ундан 5 минг долларни олган вақтида ашёвий далиллар билан ушланган.

У мазкур пул эвазига муқаддам ушбу лицейда ўқиган фуқарони юқори лавозимда ишловчи танишлари орқали Ўзбекистон давлат консерваториясига ўқишга киритиб қўйишни ваъда қилган.

Хоразмда 45 минг доллар эвазига тадбиркорнинг муаммосини ҳал этиб бермоқчи бўлган фирибгар қўлга олинди

Хоразм вилояти Урганч туманида истиқомат қилувчи тадбиркор ўзига тегишли бўлган автомобилларга ёқилғи қуйиш шохобчасини реконструкция қилиш йўли билан уни автомобилларга сиқилган газ тўлдириш компрессор станциясига айлантириш учун тегишли ҳужжатларни жорий йилнинг январь ойида вилоят ҳокимлигига тақдим этган.

Бироқ ҳозиргача унинг масаласи ҳал этилмаганидан хабар топган уддабурон кимса гўёки ҳокимият идораларидаги танишлари орқали унинг муаммосини ҳал қилиб беришини айтиб, эвазига 45 минг доллар сўраган.

ДХХ Хоразм вилояти бошқармаси ва вилоят прокуратураси ходимлари томонидан ўтказилган тезкор тадбирда мазкур шахс тадбиркордан 44 минг доллар олаётган вақтида ушланган.

Аниқланган барча ҳолатлар юзасидан жиноят ишлари қўзғатилиб, тергов ҳаракатлари олиб борилмоқда.

Суннатилла Абдуллаев
Мақолага баҳо беринг
Баҳолаганлар: 182
Рейтинг: 3
Теглар
t
×