“Тошкент иссиқлик маркази” асоссиз олинган пулларни қайтаради

“Тошкент иссиқлик маркази” МЧЖга 2,5 миллиард сўмдан зиёд ортиқча олинган даромадни қайтариш юзасидан кўрсатма берилди. Бу ҳақда Рақобатни ривожлантириш ва истеъмолчилар ҳуқуқларини ҳимоя қилиш қўмитаси хабар берди.

Қайд этилишича, “Иссиқлик электр станциялари” АЖ тизимидаги ушбу масъулияти чекланган жамиятнинг 2021-2023 йиллар давомида истеъмолчиларга етказиб берилган иссиқлик энергияси нархлари (тарифлари) шаклланиши ва қўлланилиши юзасидан олиб борилган ўрганиш ишларида тарифлар бўйича ҳақиқатда қилинган харажатлар ўрганилганда, ҳар бир Гкал учун белгиланган меъёр 14,01 м3га оширилгани аниқланган.

Оқибатда, жамият томонидан сув сарфига белгиланган меъёр 0,71 м3га оширилиб, 4 728,85 минг м3 ортиқча сув сарфланган, бунинг оқибатида 2023 йил давомида сотилган 6 667 124,3 Гкал иссиқлик энергияси ҳажмига нисбатан 2,5 миллиард сўмдан ортиқ асоссиз даромад олинган.

Рақобат қўмитаси жамият томонидан Вазирлар Маҳкамасининг белгиланган низом талаблари бузилган деб топиб, унга нисбатан ўрнатилган тартибда иш қўзғатган ва натижаси юзасидан ортиқча олинган даромадни ихтиёрий равишда истеъмолчиларга қайтариш юзасидан кўрсатма берган.

Эслатиб ўтамиз, аввалроқ “Lukoil Overseas Supply and Trading Ltd” компанияси томонидан асоссиз олинган маблағни қайтариш бўйича қарор қабул қилиниб, компания маблағни қайтариши кераклиги ҳақида хабар берилганди.