“Толибон” Россияга ўз элчисини тайинлади

Афғонистондаги “Толибон” муваққат ҳукумати Мавлавий Гул Ҳасанни Россияга элчи этиб тайинлади. Бу ҳақда Афғонистоннинг Москвадаги элчихонаси РИА Новостига маълум қилди.

Қайд этилишича, элчи тез орада Россияга етиб боради. Манба, шунингдек, Москва унинг Россияга элчи этиб тайинланиши учун келишув имзолаганини тасдиқлаган.

Апрель ойида Россия Президентининг Афғонистон бўйича махсус вакили Замир Кабулов Афғонистон ташқи ишлар ва ички ишлар вазирлари билан учрашиб, Москвадаги афғон миссияси даражаси элчи даражасига кўтарилгани ҳақида маълум қилган эди. 2021 йилда “Толибон” ҳокимиятга келганидан сўнг Афғонистон Россияда муваққат ишлар вакили, яъни Жамол Носир Гарвал даражасида вакиллик қилди.

Кейинроқ Кабулов РИА Новости агентлигига берган интервьюсида афғон элчиси Москвага келгач, бу афғон расмийларини тан олиш масаласига чек қўйишини айтганди.

1 июнь куни “Толибон” ташқи ишлар вазирлиги хабарига кўра, Россиянинг Қобулдаги элчиси Дмитрий Жирнов “Толибон” ташқи ишлар вазирлиги раҳбари Амирхон Муттақи билан учрашиб, унга Афғонистон элчисини Россиядаги қабул қилиш нотасини топширган.

Маълумот учун, 2001 йилда 11 сентябрь хуружлари ортидан АҚШ ва унинг иттифоқчилари Афғонистонга бостириб кирди. 2003 йилда БМТ Хавфсизлик Кенгаши “Толибон”ни террорчи ташкилотлар рўйхатига киритган. Шу билан бирга, Россия Олий суди “Толибон”ни террорчи ташкилот деб тан олди ва мамлакат ҳудудида унинг фаолиятини тақиқлади. 2021 йилнинг август ойида Афғонистоннинг собиқ президенти Ашраф Ғани мамлакатни тарк этди ва “Толибон” жангсиз Кобулга кирди. Бир ой ўтгач, Америка қўшинлари мамлакатни бутунлай тарк этди. 2021 йилнинг сентябрь ойида “Толибон” Афғонистон ҳукумати таркибини эълон қилди. 2021 йилнинг октябрь ойида Владимир Путин Россия “Толибон”ни террорчилар рўйхатидан чиқариш қарорига яқинлашаётганини айтиб, буни биринчи навбатда БМТ Хавфсизлик Кенгаши қилиши кераклигини таъкидлаганди. 2024 йилнинг декабрь ойида Россия Федерацияси Давлат Думаси қонунга хилоф фаолиятини тўхтатган ташкилотни, жумладан “Толибон”ни террорчилик ташкилотлари рўйхатидан чиқариш механизмини жорий қилувчи қонун лойиҳасини биринчи ўқишда қабул қилди. 

Эслатиб ўтамиз, аввалроқ Россия Президентининг Афғонистон бўйича махсус вакили Замир Кабулов Россия Афғонистонда терроризмга қарши курашда “Толибон”га ихтисослашган тузилмалар орқали ёрдам беришга тайёрлигини маълум қилганди.