“Tolibon” Rossiyaga o‘z elchisini tayinladi

Afg‘onistondagi “Tolibon” muvaqqat hukumati Mavlaviy Gul Hasanni Rossiyaga elchi etib tayinladi. Bu haqda Afg‘onistonning Moskvadagi elchixonasi RIA Novostiga ma’lum qildi.

Qayd etilishicha, elchi tez orada Rossiyaga yetib boradi. Manba, shuningdek, Moskva uning Rossiyaga elchi etib tayinlanishi uchun kelishuv imzolaganini tasdiqlagan.

Aprel oyida Rossiya Prezidentining Afg‘oniston bo‘yicha maxsus vakili Zamir Kabulov Afg‘oniston tashqi ishlar va ichki ishlar vazirlari bilan uchrashib, Moskvadagi afg‘on missiyasi darajasi elchi darajasiga ko‘tarilgani haqida ma’lum qilgan edi. 2021 yilda “Tolibon” hokimiyatga kelganidan so‘ng Afg‘oniston Rossiyada muvaqqat ishlar vakili, ya’ni Jamol Nosir Garval darajasida vakillik qildi.

Keyinroq Kabulov RIA Novosti agentligiga bergan intervyusida afg‘on elchisi Moskvaga kelgach, bu afg‘on rasmiylarini tan olish masalasiga chek qo‘yishini aytgandi.

1 iyun kuni “Tolibon” tashqi ishlar vazirligi xabariga ko‘ra, Rossiyaning Qobuldagi elchisi Dmitriy Jirnov “Tolibon” tashqi ishlar vazirligi rahbari Amirxon Muttaqi bilan uchrashib, unga Afg‘oniston elchisini Rossiyadagi qabul qilish notasini topshirgan.

Ma’lumot uchun, 2001 yilda 11 sentyabr xurujlari ortidan AQSH va uning ittifoqchilari Afg‘onistonga bostirib kirdi. 2003 yilda BMT Xavfsizlik Kengashi “Tolibon”ni terrorchi tashkilotlar ro‘yxatiga kiritgan. Shu bilan birga, Rossiya Oliy sudi “Tolibon”ni terrorchi tashkilot deb tan oldi va mamlakat hududida uning faoliyatini taqiqladi. 2021 yilning avgust oyida Afg‘onistonning sobiq prezidenti Ashraf G‘ani mamlakatni tark etdi va “Tolibon” jangsiz Kobulga kirdi. Bir oy o‘tgach, Amerika qo‘shinlari mamlakatni butunlay tark etdi. 2021 yilning sentyabr oyida “Tolibon” Afg‘oniston hukumati tarkibini e’lon qildi. 2021 yilning oktyabr oyida Vladimir Putin Rossiya “Tolibon”ni terrorchilar ro‘yxatidan chiqarish qaroriga yaqinlashayotganini aytib, buni birinchi navbatda BMT Xavfsizlik Kengashi qilishi kerakligini ta’kidlagandi. 2024 yilning dekabr oyida Rossiya Federatsiyasi Davlat Dumasi qonunga xilof faoliyatini to‘xtatgan tashkilotni, jumladan “Tolibon”ni terrorchilik tashkilotlari ro‘yxatidan chiqarish mexanizmini joriy qiluvchi qonun loyihasini birinchi o‘qishda qabul qildi. 

Eslatib o‘tamiz, avvalroq Rossiya Prezidentining Afg‘oniston bo‘yicha maxsus vakili Zamir Kabulov Rossiya Afg‘onistonda terrorizmga qarshi kurashda “Tolibon”ga ixtisoslashgan tuzilmalar orqali yordam berishga tayyorligini ma’lum qilgandi.