Togg илк электролимузинини тақдим қилди (видео)

Туркия ўзининг биринчи маҳаллий электр автомобили – Togg T10X асосида ишлаб чиқилган лимузин версиясини тақдим этди. Махсус йиғилган лимузин кеча, 28 октябрь куни илк бор жамоатчиликка намойиш этилган ва машина мамлакат Президенти Ражаб Тойиб Эрдўғанни Туркия Қуролли кучлари учун ишлаб чиқилган Altay асосий жанговар танкларини топшириш маросимига олиб борган. Бу ҳақда “Daily Sabah” хабар берди.

“Узайтирилган шассига эга Togg ўзининг чўзилган корпуси, ён эшикларнинг йўқлиги, ҳамда кўк рангли ойналардаги қопқоқлари ва кундузги чироқнинг безаклари билан эътибор қозонди”, дейилади хабарда.

Бу автомобиль Togg муҳандислари томонидан ягона прототип сифатида ишлаб чиқилган бўлиб, тўрт қатор ўриндиқ ва бутун томни қоплаган панорамали шиша том билан жиҳозланган. Салон кенг ва лимузин услубида безатилган.

Автомобилнинг олд қисмида, электр мотор жойлашган капот устида Президент муҳри ўрнатилган.

Компания вакилларининг маълум қилишича, узайтирилган Togg модели оммавий ишлаб чиқариш ёки савдо учун мўлжалланмаган. У заводга ташриф буюрувчилар ва махсус намойишлар учун ишлаб чиқилган. 

Қайд этиш жоиз, бундай ҳашаматли лимузинлари дунёда кам учрайди. Одатда АҚШ ва БААда Hummer каби машиналарнинг “чўзилган” шассили вариантлари тантанали ёки махсус маросимларда ишлатилади.

Маълумот учун, Togg компанияси BMC, Zorlu Holding, Anadolu Group, Turkcell ва TOBB (Туркия Савдо-саноат палаталари иттифоқи) каби йирик гуруҳлар консорциуми томонидан қўллаб-қувватланади. Т10Х’нинг оммавий ишлаб чиқарилиши 2022 йилда бошланган, 2023 йил март ойида буюртмалар қабул қилиниб, бир ой ўтиб етказиб беришлар йўлга қўйилган.

Эслатиб ўтамиз, 2023 йилнинг апрель ойида Ражаб Тойиб Эрдўған Ўзбекистон Президенти Шавкат Мирзиёевга Туркияда ишлаб чиқарилаётган илк миллий автомобиль –  Togg электрокарини совға қилганди.