Тиббиёт университети талабаларига стипендия берилмаяпти

Тошкент давлат тиббиёт университетининг (собиқ Тошкент давлат стоматология институтининг) 2-курс клиник ординатура (резидентура) босқичида таҳсил олаётган 19 нафар талаба 3 ойдан бери стипендия ололмаяпти. QALAMPIR.UZ’га ушбу талабалардан мурожаат келиб тушди.

Уларнинг сўзларига кўра, талабалар 2024 йилнинг 14 сентябрида ўқишга қабул қилинган. Шунга қарамай, ректор томонидан стипендияни 2 октябрдан бошлаб белгилаш буйруғи чиқарилган, аммо талабалар шунда ҳам ўтган йилнинг ноябрь ойида стипендия олган.

“Бошқа марказларда таҳсил олаётганлар сентябрь ойидан бошлаб стипендия олган. Бизга эса ўтган йили ноябрь ойида тўланган, шунда ҳам октябр ойининг ярмидан ҳисоблаб берилган эди. Бу йил ҳам асоссиз равишда кечиктирилмоқда. Ҳозиргача сентябрь, октябрь, ноябрь ойлари учун стипендиямизни олганимиз йўқ. Қолаверса, ўтган йилнинг 1,5 ойлик стипендия ҳам берилмади. Буйруқ бўйича ўтган йилдан ярим ойлик стипендия тўланмаган, лекин аслида сентябрь ойи учун ҳам тўланиши керак эди. Шундай қилиб, институт ҳар биримиздан қарийб 14 миллион сўм атрофида қарз. Бу сумма 19 кишига 266 миллион сўмга тўғри келади”, деган 2-курс ординаторлардан бири.

Талабанинг айтишича, улар бу масалада деканат ва бухгалтерия бўлими билан бир неча бор боғланган, бироқ муаммо ҳал этилмаган.

“Бухгалтериядан “тушади, тушади”, деган важлар эшитамиз. Охирги берилган муддат 10 ноябрь эди, лекин мана вақт ўтди — ҳали ҳам стипендия йўқ. Айтишларича, тушган тақдирда ҳам фақат 2025 йил учун 3 ойлик стипендия тўланар эмиш, ўтган йилги қарз эса ёпилмайди”, дея норозилик билдирган талаба.

Уларнинг айтишича, айни пайтда 1-курс ординаторларга аллақачон стипендиялари тўланган.

QALAMPIR.UZ вазиятга аниқлик киритиш мақсадида Тошкент давлат тиббиёт университети билан боғланди. Университет вакили талабалар бу борада ректоратга мурожаат қилмаганини, мурожаат қилишса, ушбу масала ҳал қилинишини айтди. Бироқ талабалар ушбу муаммога ечим топиш учун Президентнинг виртуал қабулхонасига ҳам мурожаат қилгани, деканатдан ҳам, бухгалтериядан ҳам ижобий жавоб бўлмаётганини айтмоқда.   

Маълумот учун, клиник ординатура (резидентура) – бу тиббиёт олий таълимидан кейинги амалий босқич бўлиб, унда шифокорлар ўз мутахассислиги бўйича чуқур амалий тайёргарликдан ўтади. Ординаторлар талаба мақомига эга бўлиб, уларга ҳам стипендия тўланиши белгиланган.