Телебошловчи Ҳуснора Шодиева ЙПХ ходимларини онасидан ҳақорат қилганликда айбламоқда (видео)

Телебошловчи Ҳуснора Шодиева Тошкент шаҳрида йўл-патруль инспектори томонидан ҳақоратланганини иддао қилиб чиқди. У бу ҳақида ўзининг Instagram саҳифасида йиғлаб видеомурожаат қилди.

Унинг сўзларига кўра, ҳолат пойтахтнинг Нукус кўчасида юзага келган. Бўлиб ўтган жараён ҳақида гапириб берар экан, Шодиева автомобилида йўлнинг белгиланган қисмида, тўхташ белгисига амал қилган ҳолда ҳаракатланиш ишорасини кутиб турганини айтган. Шу пайт ЙПХ ходими унга “аҳмоқ”, “ебанашка” дея бақирган ва онасидан ҳақорат қилганини айтмоқда телебошловчи.

Шундан сўнг, Шодиева инспектордан нимага бундай гапираётгани ва нега сўкканини сўраш учун ортига қайтган. Бироқ, инспектор у келгунича кетиб қолган. Унинг айтишича, ўша атрофда хизмат олиб бораётган пост-патруль хизмати ходимлари уни ҳақоратлаган ходимни яширишга уринган.

“ЙПХ ходими аёл кишини ҳақоратлашга нима ҳаққи бор? Менга оғир ботди. Мен қайрилиб келгунимча у кетиб қолибди. Нима айб қилдим? Мен бу ҳодиса бўйича нима қилиш кераклигини билмайман. Ҳеч қанақа қоида бузганим йўқ, лекин тушунмаяпман: нега у мени ҳақоратлади?” деган у.

Шодиева, шунингдек, “Ўзбекистонда аёлларга нисбатан ҳеч қанақа зўравонлик бўлмаслиги учун курашилаётган бир пайтда ЙПХ ходимлари бу шаклда аёл кишига бақириши ва бемалол ҳақоратлаши мумкинми?” дея пойтахт Ички ишлар бош бошқармасига савол билан юзланган.

“ЙПХ ходимлари аслида фуқаролар учун хизмат қилиши керак. Мен адолат бўлишини хоҳлайман. Мен ўша жойда ҳамма ЙПХ ходимлари турган ҳудудга бордим, улар бўлса худди бир бирини танимайдигандек тутди. Мен бўлса “менинг ўрнимда сизнинг аёлингиз, болангиз, онангиз бўлса, уларни сўкишса, шунақа муносабатда бўлармидингиз, жим турармидингиз?” деб сўрадим”, дейди у.

Ҳуснора Шодиева ЙПХ ходимлари бир-бирининг қилган ишларини яшираётганидан шикоят қилган.

“Нима қилиш мумкин? Улар бир-биринининг “орқасини ёпишяпти”. Бутун Ўзбекистонда аёлларга нисбатан зўравонликка қарши кураш кетаётган бир пайтда бизнинг ЙПХ ходимларимиз шунчаки ўтиради ва бемалол сўкади”, дейди телебошловчи.

Шодиева сўзида давом этаркан, автомобилида видеокамера йўқлиги, ҳолатни ёзиб олиш имкони бўлмаганини билдирган. Воқеа баён қилинганига 18 соатдан ортиқ вақт ўтган бўлса ҳам Тошкент шаҳар ИИББ, Йўл ҳаракати хавфсизлиги хизмати муносабат билдиргани йўқ.