Ташиев илк бор расмий тадбирда кўриниш берди (видео)

Қирғизистон Миллий хавфсизлик давлат қўмитасининг собиқ раиси Қамчибек Ташиев лавозимидан озод этилганидан буён илк бор расмий тадбирда кўриниш берди. У бугун, 15 апрель куни Қирғизистон футбол иттифоқи навбатдаги конгрессида иштирок этмоқда. Ушбу йиғилишда иттифоқнинг янги президенти сайланиши кутилмоқда. 

Қамчибек Ташиев ўз нутқи давомида Қирғизистон футбол иттифоқига икки йилдан ортиқ вақт давомида раҳбарлик қилганини таъкидлаб, шу даврда амалга оширилган ишлар юзасидан ҳисобот берди. 

“Сизлар билан кўришмаганимизга анча бўлди. Мени кўриб, “Бу қаердан пайдо бўлиб қолди?” деб бироз ҳайрон бўлгандирсиз”, дея сўз бошлаган у.

Қамчибек Ташиевга кўра, унинг раҳбарлиги даврида давлат кўмагида қирғиз футболи ўз тарихида илгари кузатилмаган натижаларга эришган. 

“Икки йил ичида 17 та янги стадион қурдик, яна 14 таси қурилмоқда. Бунга қарийб 7 миллиард сом йўналтирилди ва худди шунча миқдордаги ишлар давом этмоқда. Бу маблағлар ўз-ўзидан пайдо бўлиб қолгани йўқ – давлат ва ҳамкорларимиз катта ёрдам кўрсатди”, дея баёнот берган у. 

Эслатиб ўтамиз, жорий йил 10 февраль куни Қирғизистон Президенти Садир Жапаров Қамчибек Ташиевни Миллий хавфсизлик давлат қўмитаси раиси лавозимидан озод қилган эди. Ўшандан бери МҚХБнинг бир қатор собиқ юқори мартабали раҳбарлари қўлга олинди, айримлари эса ишдан бўшатилди. Жўғўрқу Кенешнинг тўққиз нафар депутати, жумладан Қамчибек Ташиевнинг укаси Шоирбек Ташиев мандатини топширди. Кейинроқ у “Қирғизнефтгаз” корхонаси фаолияти билан боғлиқ коррупция айблови билан ҳибсга олинди. Махсус хизматнинг собиқ раҳбари ҳозирча сўнгги воқеаларга изоҳ бергани йўқ.