Танасига треккинг таёғи санчилган эркак 16 км юриб, омон қолди

АҚШнинг Монтана штатида 32 ёшли Дэвид Cифалди танасини тешиб кирган треккинг таёғи билан 16 километр юриб, омон қолди. Бу ҳақда “The Guardian“ хабар берди.

Маълум қилинишича, ҳодиса жорий йилнинг 20 июль куни Cифалди икки дўсти билан Гранит пик чўққисига чиқаётган пайтда, тахминан 3,6 минг метр баландликда содир бўлган. У қоялар устида мувозанатини йўқотиб, қўлидаги треккинг таёғи устига йиқилган. Натижада таёқ танасининг бир томонидан кириб, иккинчи томонидан чиқиб кетган. Бироқ Cифалди ўзи тез тиббий ёрдам ходими бўлгани сабабли ваҳимага тушмаган. У ўз ҳолатини баҳолаб, жароҳат ўша вақтда ҳаёти учун бевосита хавф туғдирмаётганини аниқлаган.

“Ўша пайтда тиббий ходимлик рефлексларим ва касбий билимларим ишга тушди. Ўзимни тезда текшириб, жароҳат ҳаётим учун бевосита хавф туғдирмаётганини англагач, тоғдан ўз кучим билан туша олишимга ишондим”, дейди у.

Шундан сўнг, Cифалди танасига санчилиб қолган треккинг таёғи билан тоғдан туша бошлаган. У 6,5 соат давомида қарийб 16 километр йўл босиб, қутқарувчилар ва тиббий ёрдам етиб бориши мумкин бўлган хавфсиз ҳудудга чиққан.

Хабар қилинишича, ушбу ноодатий ҳодисадан мўъжизавий тарзда омон қолган Cифалди шифохонадаги даволаниш харажатларини қоплаш мақсадида маблағ йиғиш кампаниясини бошлаган.

Эслатиб ўтамиз, аввалроқ Мексикада 14 кун сув босган конда яшаган эркак омон қолган эди.