Таксичиларни қўрқитиб, улардан пул ундирган жиноий гуруҳ ушланди (видео)

Тошкентда таксичилик билан шуғулланган шахслардан 810 доллар миқдорида ойлик тўлов ундирган жиноий гуруҳ аъзолари ушланди. Бу ҳақда Ички ишлар вазирлиги хабар берди.

Қайд этилишича, Тошкент вилоятида яшовчи фуқаронинг аризасига кўра, вилоят ҳудудидан Тошкент шаҳри – Яшнобод туман йўналишида такси хизматини кўрсатувчи ҳайдовчиларга таҳдид қилиб, ҳақ-ҳуқуқларни топтаб, ноқонуний пул топиш мақсадида ўзбошимчалик билан ойлик тўлов жорий қилган гуруҳ қўлга олинган.

Хусусан, “Бычок” лақабли 1989 йилда Тошкент шаҳрида туғилган Ш.У. (муқаддам 3 маротаба Жиноят кодексининг 277-моддаси (безорилик) билан судланган) жиноий шериклари билан биргаликда Damas русумли автомашина ҳайдовчисини уриб тан жароҳат этказган. Спортнинг турли йўналишлари билан шуғулланиб келган ушбу шахс ҳайдовчининг тирикчилик манбаи бўлган автомашинаси калитини зўрлик ишлатиб олиб қўйган.

Бундан ташқари, жиноий гуруҳ доимий равишда ҳайдовчиларнинг йўналишда ҳаракат қилишига тўсқинлик қилиб келган. Ариза муаллифини ҳам ҳаёти ва соғлиғига жиддий зиён етказиш билан қўрқитиб, келгусида Яшнобод тумани ҳудудига қатновни амалга ошириш эвазига олдиндан икки ойлик тўлов сифатида 810 доллар олган. Кейинги тўловларни тўлиқ беролмагани сабабли йўналишга чиқишини ўзбошимчалик билан тақиқлаган.

Билдирилишича, мазкур ҳолат юзасидан жиноий гуруҳ етакчиси ва унинг шерикларига нисбатан Жиноят кодексининг 165-моддаси (товламачилик) 2-қисми “в” банди билан жиноят иши қўзғатилган.

Ушбу жиноий гуруҳ ҳаракатларидан азият чекканлар ички ишлар органларига ёки 102 қисқа рақамига қўнғироқ қилиши сўралади. Шахс сир сақланиши кафолатланади.

Қайд этиш жоиз, Ўзбекистон Республикаси Президенти Шавкат Мирзиёев Олий Мажлис ва Ўзбекистон халқига йўллаётган мурожаатномасида Ўзбекистоннинг жиноий тўдалар фаолиятига чек қўйишга куч-қудрати етишини ва буни албатта қилишини айтган эди.

Эслатиб ўтамиз, аввалроқ Сурхондарё вилояти Денов туманида фуқароларга турли йўллар билан таҳдид қилиб уларга тегишли моддий бойликларга зўрлик ишлатиб тортиб олиш билан шуғулланиб келаётган жиноий гуруҳ ушланганди.