Сузоқдаги фожиа: амалдорлар айбдор деб топилди

Қирғизистон Президенти Садир Жапаров топшириғига кўра тузилган идоралараро комиссия 2 май куни Жалолобод вилоятининг Сузоқ туманида юк машинаси мактаб ўқувчиларини уриб юбориши билан боғлиқ ҳодиса юзасидан текширувни якунлади. Мутахассислар айбни маҳаллий ҳокимият вакиллари зиммасига юклади, деб хабар берди Садир Жапаров матбуот хизмати.

Комиссия аъзолари ўз хулосаларида яйловда ўтказилган манасчилар мусобақаси ташкилотчилари тадбир иштирокчилари хавфсизлигини таъминлаш учун зарур чораларни кўрмаганини таъкидлаган. Туман ва вилоят ҳокимликлари билан ёмон муносабатда бўлган ички ишлар органлари ходимлари, шунингдек, таълим муассасаларининг масъул ходимлари ҳам масъулиятни ҳис қилиб ишламаган.

Масалан, мактаб ўқувчилари ўртасида ўтказиладиган танловнинг аниқ санаси тўғрисида маҳаллий ҳокимият органлари раҳбарларига хабар берилмаган. Махсус комиссия аъзолари бу камчиликни 1 майдан 5 майгача республикада дам олиш кунлари деб эълон қилингани билан изоҳлаган.

Маълумотларга кўра, "Манас" достонини ўқишда тумандаги 18 та мактабдан 2 минг 878 нафар ўқувчи, 341 нафар ўқитувчи иштирок этган. Аммо уларнинг хавфсизлигини фақат иккита ИИО ходими таъминлаган.

“Воқеа ҳолатларини ўрганиш натижаларига кўра, идоралараро комиссия интизомий жазо чораларини қўллаш, шунингдек, тегишли вазирликлар ва маҳаллий давлат ҳокимияти органлари раҳбарлари ва ходимларини эгаллаб турган лавозимидан озод этишни тавсия қилди”, дейилади экспертлар хулосасида. 

Аниқлик киритилишича, айни дамда 21 нафар мансабдор интизомий жавобгарликка тортилган, яна олти нафари ишдан бўшатилган.

Маълумот учун, жорий йилнинг 2 май куни ҳайдовчисиз  Hyundai Porter русумли мини-юк машинаси тепаликдан пастга ҳаракатланиб,  асосан 9 ёшдан 16 ёшгача бўлган болалар бўлган бир гуруҳ тадбир иштирокчиларини босиб кетганди. Дастлаб жабрланганлар сони 29 нафар экани ҳақида хабар берилган эди, кейин уларнинг сони 35 нафарга етган.

Ҳайдовчига нисбатан Қирғизистон Жиноят кодексининг 312-моддаси (Йўл ҳаракати ва транспорт воситаларидан фойдаланиш хавфсизлиги қоидаларини бузиш) билан жиноий иш қўзғатилган.