Суд Трампнинг USAID’га қарши ҳаракатини тўхтатиб қўйди

Америка федерал судьяси Карл Николс АҚШ ҳукуматининг АҚШ Халқаро тараққиёт агентлиги (USAID) ходимларининг 2 минг 200 га яқинини маъмурий таътилга чиқариш тўғрисидаги қарорини тўхтатди. Бу ҳақда “The Washington Post” хабар берди.

Нашрнинг ёзишича, бундай қарор бир гуруҳ ходимлар томонидан судга берилган даъводан сўнг қабул қилинган.
Маълум қилинишича, тақиқ 14 февралгача амал қилади. Бундан ташқари, судья Карл Николс ишдан четлатилган 500 га яқин ходимни ишга қайтишини буюрган.

“Николс қисқа пауза ҳукуматга ҳеч қандай зарар келтирмаслигини таъкидлади. Тахминларга кўра, бу вақт давомида судья ушбу масалани батафсил ўрганиш имкониятига эга бўлади”, дейилади хабарда.

“Reuters”нинг ёзишича, судья Николс касаба уюшмаларининг бошқа талабларини, жумладан, USAID биноларига киришни очиш ва агентлик грантлари ва шартномалари учун маблағни тиклашни истамайди.

Трамп томонидан Давлат котиби этиб тайинланган Марко Рубионинг айтишича, янги маъмурият агентлик фаолиятини юқоридан пастгача кўриб чиқишни режалаштирмоқда. Унинг фикрича, ташкилотнинг айрим лойиҳалари АҚШ манфаатларига зарар келтириши мумкин.

Эслатиб ўтамиз, аввалроқ АҚШ Халқаро тараққиёт агентлиги (USAID) уни тугатиш ҳақида таклиф бергани учун Президент Дональд Трамп ва унинг маъмурияти аъзолари устидан судга мурожаат қилмоқчилиги ҳақида хабар берилганди. Даъво аризасида USAIDʼни тарқатиб юбориш бўйича ҳаракатлар конституцияга зид ва ноқонуний бўлгани ҳамда Америка етакчиси президентлик ваколатларидан ошиб кетгани таъкидланган.