СССРнинг охирги раҳбарияти буюк давлатимизни вайрон қилди – Путин

СССРнинг собиқ партиявий раҳбарлари, кўпчилик одамларнинг иродасига зид равишда, Совет Иттифоқини йўқ қилишган. Россия Президенти Владимир Путин кеча, 30 сентябрь куни Украинанинг Донецк, Луганск, Херсон ва Запорожье вилоятларини аннексия қилишга бағишланган маросимда шундай фикр билдирди.

“Беловеж ўрмонида ўша пайтдаги партия элитаси вакиллари СССРни парчалашга қарор қилишди. Одамлар тўсатдан ўз ватанларидан узилиб қолишди. Бу эса халқимизни парчалаб ташлади, жамиятимизни иккига бўлиб юборди, миллий ҳалокатга айланди. Аммо энди бу муҳим эмас. Совет Иттифоқи йўқ, ўтмишни қайтариб бўлмайди. Ҳа, ва бугунги кунда Россияга бу керак эмас. Биз бунга интилмаяпмиз”, дейди Президент.

Путин одамлар ватанидан узилиб қолди деб айнан нимани назарда тутгани номаълум. Негаки, собиқ иттифоқ кўплаб миллатларни куч билан бирлаштирган давлат бўлиб, бутун мавжудлиги давомида ана шу миллийликка, қарши курашиб, ягона совет халқини яратишга интилган ва буни уддалай олмаган. Путин ҳам ўша амалга ошмаган орзу – совет халқига ишора қилган бўлиши мумкин.

Россия Президенти бир неча бор СССР парчаланишини фожиа ва постсовет ҳудудидаги ҳозирги зиддиятларнинг сабаби деб атаган. СССР парчаланиши ҳақидаги энг машҳур баҳони Путин 2005 йилда Федерал Мажлисда қилган нутқида берган. Ўшанда давлат раҳбари буни XX асрнинг энг катта геосиёсий фалокати деб атади.

2015 йилда Путин Совет Иттифоқининг қулаши натижасида “рус халқи дунёдаги энг катта бўлинган халққа айланди” деб таъкидлаганди.

Путин 2019 йилда “Россия чақирмоқда” форумнинг ялпи мажлисида! Совет Иттифоқининг қулашига унинг раҳбариятининг самарасиз иқтисодий сиёсатини сабаб қилиб кўрсатган ва бу эса сиёсий соҳага ҳам таъсир қилганини айтган. Унинг қўшимча қилишича, Болтиқбўйида миллатчилик туйғуларининг кучайиши СССРнинг парчаланиши билан деярли боғлиқ эмас. Собиқ СССР Президенти Михаил Горбачёв Россия раҳбарининг сўзларига жавобан, инқироз иқтисодий сабабларга кўра эмас, балки республикалар ўртасидаги муносабатларга асосланганини айтган.

Эслатиб ўтамиз, 30 сентябрь куни Путин Украинанинг Донбасс минтақасидаги тан олинмаган Луганск ва Донецк халқ республикалари ҳамда Херсон ва Запорожье вилоятларини Россияга қўшиб олиш, аннексия қилиш ҳақидаги шартномаларни имзолади.