Собиқ МХХнинг панжараларга ўралган биноси сотувга қўйилди

Жамият 9711
image
-

Ўзбекистон Республикаси собиқ Миллий Хавфсизлик Хизматининг “Марказий биноси” оммавий савдоларга чиқарилди. Бу ҳақда Республика Давлат активларини бошқариш агентлиги хабар бермоқда

Маълум қилинишича, Тошкент шаҳар, Юнусобод тумани, Сайилгоҳ кўчасида жойлашган “Марказий бино” ҳудуди бўйича оммавий савдо жараёнлари бошланган.
 
Унга кўра, давлат активини сотиш икки босқичда ўтказилади.

Бунда биринчи босқичда – талабгорлар олдиндан сараланади, жумладан, савдоларда қатнашиш учун талаб қилинган ҳужжатларнинг тўлиқлиги, гаров (заклад) пули келиб тушгани, давлат активидан келгусида фойдаланиш йўналишларига қўйилган талабга нисбатан талабгор томонидан таклиф этилган бизнес концепцияси лойиҳасининг мақбул ёки мақбул эмаслиги кўриб чиқилади.

Иккинчи босқичда – талабгорнинг тижорат таклифлари (сотиб олиш нархи ва тўловни амалга ошириш муддати) ҳамда тўлов қобилияти баҳоланади.

Савдода юридик ва жисмоний шахслар иштирок этишлари мумкин. Бунда давлат активини сотиб олиш бўйича биринчи босқичда битта таклиф келиб тушган ҳолларда, савдолар ўтказилмаган деб эътироф этилади.

Қайд этилишича, ушбу бинодан келгусида офис, савдо, савдо-кўнгилочар, маданий-хордиқ, спорт, туристик ва бошқа хизматлар кўрсатиш фаолияти йўналишларидан бири ёки бир нечтасини амалга оширилиши талаб этилади.

Шунингдек, савдо якунлари бўйича савдо ғолиби билан Давактив агентлиги томонидан хабарнома юборилган санадан бошлаб 20 кун ичида олди-сотди шартномаси расмийлаштирилади (форс-мажор ҳолатлари бундан мустасно) ва савдоларга қатнашиш учун тўланган гаров (заклад) пули давлат активи харид тўловининг бир қисми сифатида қабул қилинади.

Давлат тендер комиссияси ёки Ишчи орган ўз хоҳишига кўра ҳеч қандай мажбуриятни ўз зиммасига олмаган ҳолда, ҳар қандай вақтда савдони тўхтатиши ҳамда савдо жараёнида талабгорлардан қўшимча ва ёки аниқлаштирувчи маълумотлар сўраши мумкин.

Фаррухжон Муродқулов
Мақолага баҳо беринг
Баҳолаганлар: 305
Рейтинг: 3
t
×