Скарлетт Йоханссон сунъий интеллектни судга берди

Америкалик машҳур актриса Скарлетт Йоханссон унинг исми ва расмини реклама лицензиясисиз ишлатадиган дастурни судга берди. Бу ҳақда "Variety" нашри маълум қилди.

Гап шундаки, тасвир яратиш иловасида сунъий интеллект (СИ) орқали 22 сониялик реклама ишланган ва унда сохта кадрлар яратиш учун Йоханссоннинг ҳақиқий суратларидан фойдаланилган. Аммо актрисадан бунинг учун рухсат олинмаган. Шундан сўнг ролик Х ижтимоий тармоғига жойланган. 

Видео Mаrvel компаниясининг “Қора бева” фильмидан олинган. Унинг остига эса “Тасвир Лиса сунъий интеллекти томонидан яратилган. Уларнинг бу одамга ҳеч қандай алоқаси йўқ”, деб ёзиб қўйилган. Аммо Скарлетт ўз ҳуқуқини талаб қилишга қарор қилди. 

“Биз буни шунчаки қабул қилмаймиз. Ушбу вазиятда муаммони ҳуқуқий йўл билан ҳал қиламиз”, дейди актрисанинг адвокати Кевин Йорн. 

Маълумотларга кўра, ушбу норозиликдан сўнг видео тармоқдан ўчирилган. 

Йоханссон СИ томонидан бундай ҳуқуқбузарликка учраган ягона санъаткор эмас. Ўтган ойда америкалик яна бир машҳур актёр Том Хэнкс ҳам Instagram орқали ўзининг сунъий интеллект ёрдамида яратилган сурати мавжуд реклама сабабли мухлисларини огоҳлантирганди.  

Маълумот учун, Скарлетт Йоханссон Американинг энг кассабоп актрисаларидан бири. Хусусан, у 2018 ва 2019 йилларда дунёнинг энг кўп гонорар олувчи актрисаси, деб топилган. "Time" журнали эса 2021 йилда уни дунёдаги энг нуфузли 100 кишидан бири деб ёзган. Йоханссоннинг фильмлари бутун дунё бўйлаб 14,3 миллиард доллардан кўпроқ даромад келтирди.