“СИ монополияси – инсоният учун таҳдид”. Цукерберг манифест эълон қилди

Марк Цукербергнинг ҳисоблашича, сунъий интеллект монополияси бутун инсоният учун таҳдид. У ушбу технологиянинг кичик бир компаниялар гуруҳи қўлида тўпланиб қолиши оқибатида кўпчилик одамлар манфаатларига хавф туғилишига йўл қўймаслик учун сунъий интеллектни марказлаштиришдан воз кечишга чақирди. Миллиардер бу ҳақда ўзининг жорий йилнинг 10 август куни эълон қилинган “Келажак ҳаммага тегишли” номли манифестида маълум қилди.

Унинг фикрича, асосий хавф бир ташкилот ёки мамлакат ушбу технология устидан ҳаддан ташқари катта назоратга эга бўлишида.

“Энг катта хавф шундаки, битта ҳукумат ёки ташкилот технология устидан жуда катта ҳокимиятга эга бўлади”, дейилади манифестда.

Ҳужжатда СИ ҳар бир инсоннинг ҳуқуқ ва имкониятларини кенгайтирувчи восита сифатида тақдим этилган.

“Суперинтеллектни марказлаштириш ўрнига, биз уни кенг тарқатишимиз ва ҳар бир инсонга уни бошқариш имкониятини беришимиз керак. Бу одамлар ушбу қудратли янги технологиядан ўз салоҳиятларини тўлиқ рўёбга чиқариш учун фойдалана оладиган шахсий қудратнинг янги даврини бошлаб бериши мумкин”, деб ёзди Марк Цукерберг.

Meta асосчиси бошқа компанияларда сунъий интеллектни ривожлантириш бўйича муҳокамалар “апокалиптик кайфиятларга тўла” эканидан ҳайратда эканини билдирди. У сунъий интеллект шунчалик хавфлики, ягона хавфсиз йўл – устидан мутлақ ҳокимиятни жамлаш, деган ишончни ички зиддиятли ва хатарли деб атаган.

“Тарихан, мутлақ ҳокимият агар етарлича маърифатли бўлса, инсоният ҳақида хайрихоҳлик билан ғамхўрлик қилади, деган умид хавфсиз ёки ижобий натижаларга олиб келмаган”, дея таъкидлаган манифест муаллифи.

У, шунингдек, OpenAI ва Anthropic каби рақобатчиларнинг ёндашувини танқид қилган, чунки унинг фикрича, улар СИни жисмоний шахслар учун эмас, балки корпорациялар ва ҳукуматлар учун яратмоқда. Унинг сўзларига кўра, агар ушбу лабораториялар етакчилик қилса, кучлар мувозанати йирик институтлар фойдасига оғади.

Манифестда ҳокимият органлари учун тавсиялар, жумладан, Америка компаниялари Хитой билан рақобатлаша олиши учун энергетика инфратузилмасини жадаллаштирилган ҳолда ривожлантириш ва ўқитиш маълумотларига қўйилган чекловларни қайта кўриб чиқиш кабилар ўрин олган.

Манифестнинг эълон қилиниши компаниянинг шахсий компютерларда ишлаш учун мўлжалланганини таъкидлаётган янги очиқ Muse Glimmer модели анонсига тўғри келди. Шунингдек, Марк Цукерберг янада қудратлироқ бўлган Muse Spark 1.2 моделидан фойдаланиш имкониятини бериш режалари ҳақида хабар берди.

Эслатиб ўтамиз, аввалроқ террористик ташкилотлар сунъий интеллектдан нафақат тарғибот, балки ҳужумларни режалаштириш ва тайёрлашда ҳам тобора фаолроқ фойдаланаётгани ҳақида хабар берилган эди.