Шуҳрат Абдураҳмоновга янги ўринбосарлар тайинланди

Бугун, 8 июнь куни Андижон вилояти ҳокимига икки нафар ўринбосар тайинланди. Бу ҳақда вилоят ҳокимлиги матбуот хизмати хабар берди.

Маълум қилинишича, Абдусаттор Ҳалимжонович Отабоев Андижон вилояти ҳокимининг жамоат ва диний ташкилотлар билан алоқалар бўйича ўринбосари этиб тайинланган.

Маълумот учун, Отабоев 1976 йилда Наманган вилояти Тўрақўрғон туманида туғилган. 1998 йилда Наманган муҳандислик педагогика институтини (кундузги) тамомлаган.

Ушбу лавозимга тайинлангунига қадар 51411-сонли ҳарбий қисмда контракт бўйича ҳарбий хизматчи вазифасида фаолият олиб борган.

Шу билан бирга, Элмурод Рўзибоевич Исмоилов Андижон вилояти ҳокимининг ўринбосари – вилоят инвестициялар, саноат ва савдо бошқармаси бошлиғи этиб тайинланган.

У 1987 йилда Андижон вилояти Асака туманида туғилган. 2014 йилда Андижон қишлоқ хўжалиги институтини (кундузги) тамомлаган.

Ушбу лавозимга тайинлангунига қадар Андижон вилояти ҳокимлиги инвестициялар, саноат ва савдо масалалари бўйича котибияти мудири вазифасида фаолият олиб борган.

Эслатиб ўтамиз, аввалроқ Тошкент вилояти Нурафшон шаҳрининг ҳокими Илҳом Қиличхонов фаолиятини янги вазифада давом эттириши муносабати билан ишдан бўшатилганди.