Шавкат Мирзиёевнинг Грузияга ташрифи якунланди

Бугун, 3 июль куни Ўзбекистон Республикаси Президенти Шавкат Мирзиёевнинг Грузияга давлат ташрифи доирасидаги тадбирлар якунига етди. Шота Руставели номидаги халқаро аэропортда олий мартабали меҳмонни Грузия Бош вазири Ираклий Кобахидзе кузатиб қўйди. Бу ҳақда Президент матбуот хизмати хабар берди.

Қайд этилишича, Тбилиси шаҳрида давлат раҳбари Грузия Президенти Михаил Кавелашвили ва Бош вазири Ираклий Кобахидзе билан музокаралар ўтказган.

Ўзбекистон – Грузия дўстлик ва кўп қиррали ҳамкорлик муносабатларини янада мустаҳкамлаш ҳамда сиёсий, савдо-иқтисодий, инвестициявий, транспорт-транзит, туризм ҳамда маданий-гуманитар соҳалардаги амалий ҳамкорликни кенгайтиришнинг муҳим масалалари кўриб чиқилган.

Музокаралар якунида Стратегик шериклик муносабатларини ўрнатиш тўғрисидаги декларация имзоланган. Бундан ташқари, устувор йўналишлардаги ҳамкорликни янада ривожлантиришга қаратилган икки томонлама ҳужжатларнинг салмоқли тўплами алмашилган.

Орбелиани саройида Ўзбекистон етакчисига Грузиянинг олий давлат мукофоти – “Олтин мўйна” орденини тантанали топшириш маросими бўлиб ўтди.

Шунингдек, давлат раҳбари Тбилиси шаҳрида буюк шоир ва мутафаккир Алишер Навоий ҳайкалининг очилиш маросимида иштирок этди.

Давлат ташрифи якунлангач, Ўзбекистон Президенти Тошкент шаҳрига жўнаб кетган.