Шавкат Мирзиёевнинг Бухорога ташрифи режалари нимадан иборат?

Аввалроқ Ўзбекистон Республикаси Президенти Шавкат Мирзиёевнинг Бухорога жўнаб кетганлигини хабар берган эдик.

Мамлакат раҳбари 2018 йил 16-17 февраль кунлари Бухоро вилоятига ташрифи чоғида ҳудуднинг замонавий қиёфасини яратиш, саноатнинг ишлаб чиқариш ва қайта ишлаш, транспорт-логистика, хизмат кўрсатиш, қишлоқ хўжалиги, таълим, сайёҳлик салоҳиятини янада ошириш бўйича соҳа мутасаддиларига топшириқлар берганди.
 
Мазкур топшириқлар ижроси доирасида улкан ишлар амалга оширилди. Янги саноат корхоналари, тадбиркорлик субъектлари ташкил этилди. Маҳаллийлаштириш даражаси ва экспорт ҳажми ошди. Транспорт ва сервис инфратузилмаси ривожланиб, сайёҳлар оқими кўпайди. Қишлоқ хўжалигида фойдаланилмаган имкониятлар ишга солинди. Янги уй-жойлар, ижтимоий объектлар бунёд этилди.

Бухоро мамлакатимиз вилоятлари ичида ҳудудининг катталиги жиҳатидан Навоийдан кейин иккинчи ўринда туради. Қулай географик ҳудудда жойлашгани, тарихий обидалар, табиий ресурсларга бойлиги, қишлоқ хўжалиги соҳасида тўпланган тажриба сабаб вилоятда туризм, саноат, логистика, агросаноат соҳалари изчил ривожланмоқда.

Ташриф давомида Президент аввалги топшириқлар ижроси, амалга оширилаётган бунёдкорлик ишлари билан танишиши, галдаги муҳим вазифаларни белгилаб бериши режалаштирилган. Бу ҳақда УзА “Ўзбекистон 24” телеканалига маълумотларига таяниб хабар бермоқда.