Семпличи Шомуродовни ўйинга туширмагани сабабини айтди

Италия А Сериясининг 37-турида “Специя” ва “Торино” жамоалари ўзаро баҳс олиб борди. Учрашувда ўзбекистонлик ҳужумчи Элдор Шомуродов захира ўриндиғидан жой олди. 

Йирик 0:4 ҳисобида мағлубиятга учраган “Специя” клуби бош мураббийи Леонардо Семпличи ўйиндан кейин фикрлари билан ўртоқлашди.

“Жуда хафаман. Биз учун ўта муҳим учрашувда рақибга етарли қаршилик кўрсата олмадик ва баҳс мана шундай якунланди. Иккита гол ўтказгандан кейин майдонда йўқолиб қолдик. Бундай бўлиши керак эмас эди. Асосий айбни ўзимга оламан, балки футболчиларга бу ўйиннинг нақадар муҳимлигини етказа олмагандирман”, дейди Леонардо.

“Специя” устози эндиликда камчиликларни бартараф этиб, Римда бўладиган охирги ўйинга пухта тайёргарлик кўриш шартлигини таъкидлаб ўтди.

“Етарлича қийинчилик бор. Бундай учрашувлар ҳар доим босим ўтказади. Бугун ўзимиз истаган ўйинни кўрсата олмадик. Энди бир ҳафта давомида сўнгги учрашувга тайёргарликни янада пухта ташкил қилишимиз керак”, дейди Семпличи.

Шунингдек, Семпличи ўзбекистонлик ҳужумчи Элдор Шомуродовга бу сафар ҳам имконият берилмагани сабабини изоҳлади.

“Кўп нарсада хато қилдик, ўзимизни оқлашимиз нотўғри. Вазиятга реал баҳо бериш керак. Асосий масъулият менинг бўйнимда. Шу ўринда, Элдор Шомуродовни ўйинга туширмаганим вазият тақозоси эканини айиб ўтишим керак”, дейди Леонардо Семпличи.

Муҳсинжон Умурзоқов