Сайловда инсон омили бутунлай чиқариб ташланди – Садир Жапаров

Қирғизистон Президенти Садир Жапаров бугун, 30 ноябрь куни рафиқаси билан навбатдан ташқари парламент сайловларида овоз берди. Бу ҳақда “24.kg” хабар берди.

Давлат раҳбарининг сўзларига кўра, бу алоҳида овоз бериш, чунки бутун жараён автоматлаштирилган, инсон омили бартараф этилган.

“Илгари сайлов бюллетенлари қўлда тарқатиларди, ҳар бир сайлов участкасида 50-100 тадан қўшимчаси қоларди, номзодларга белги қўйиларди. Энди бундай эмас, ҳамма нарса компьютерлаштирилган. Мен учун бутун жараён беш дақиқага яқин вақтни олди – мен кириб келдим, бюллетенимни олдим ва овоз бердим. Нега биз бундай ислоҳотларни амалга оширдик? Ҳамма эслаганидек, республикада учта тўнтариш бўлган, буларнинг барчаси сайловлар туфайли – президентлик ёки парламент сайловлари туфайли бўлган”, деди Садир Жапаров.

У бу сайлов кампаниясида масофавий овоз бериш туфайли сайловчилар фаоллиги одатдагидан юқори бўлишига умид билдирди ва фуқароларни фаол овоз беришга чақирди.

Садир Жапаровнинг айтишича, ҳали ҳам битта муаммо қолмоқда: овозларни сотиб олиш/сотиш.

Жогорку Кенеш (Олий Кенгаш) депутатлари учун сайлов бугун Бишкек вақти билан соат 8:00 да бошланди. Сайловчилар рўйхатига жами 4 миллион 294 минг 243 нафар фуқаро киритилган.

Республикада 2492 сайлов участкаси очилган. Яна 100 та станция хорижда фаолият кўрсатмоқда.

Овоз бериш маҳаллий вақт билан соат 20:00 гача давом этади. Дастлабки натижалар деярли дарҳол эълон қилинади.

Сайлов натижалари 14 декабргача санаб чиқилади ва расман эълон қилинади.

Эслатиб ўтамиз, аввалроқ Қирғизистонда Жогорку Кенеш депутатлигига номзоднинг қизи ва жияни овозларни сотиб олишда гумон қилиниб, уларга қидирув эълон қилинганди.