Савдо уруши туфайли олтин рекорд даражада қимматлади

Олтин нархи янги юқори даражага кўтарилди, чунки инвесторлар АҚШ ва Хитой ўртасидаги савдо уруши оқибатларидан хавотирга тушмоқда. Бу ҳақда BBC хабар берди.

16 апрель куни жонли бозорда олтин ҳар бир унция учун $3,357.40 га етди, сўнгра бироз пасайди. Бу йил бошидан бери нарх тахминан учдан бир қисмга ошган.

Бу ўсиш АҚШ Марказий банки раҳбари Жером Пауэллнинг изоҳларидан сўнг кузатилди. Унинг айтишича, Президент Дональд Трампнинг тариф сиёсати секинроқ иқтисодий ўсиш, нархларнинг ошиши ва ишсизлик хавфини келтириб чиқариши мумкин.

Қимматбаҳо металл иқтисодий беқарорлик пайтида инвесторлар учун хавфсиз актив сифатида қаралади. 16 апрель куни Чикагодаги Иқтисодий клубда Жером Пауэлл шундай деди: 

“Сўнгги ҳафталарда эълон қилинган кутилмаган юқори тарифлар АҚШ иқтисодий ўсишини секинлаштириши ва истеъмолчилар учун нархларни ошириши мумкин”.

Унинг нутқи халқаро молия бозорларидаги беқарорлик давридан кейин янгради — инвесторлар янги импорт божлари ва АҚШ-Хитой ўртасидаги кучайиб бораётган савдо урушларига жавоб қайтармоқда.

SPI Asset Management компаниясининг савдо ва бозор стратегияси бўйича раҳбари Стивен Иннеснинг айтишича, олтин тўлиқ “қутқарув қайиғи” ҳолатида, у дунёдаги энг оммавий савдо активига айланган. 

“Доллар савдо сиёсатининг кескин ўзгаришлари остида ларзага келмоқда ва портфель бошқарувчилари сиёсий ечимларга ишончни йўқотишди”, деб қўшимча қилди Иннес.

Аналитиклар бу йилги олтин нархидаги ўсишни 40 йилдан ортиқ аввалги Эрон инқилоби билан солиштиришмоқда. Ўшанда, 1979 йил ноябрдан 1980 йил январгача олтин нархи деярли 120% га ошган эди.

Олтин илк бор ўтган ойда ҳар унция учун $3,000 дан ошиб ўтди, чунки глобал савдо уруши таъсири ҳақидаги ноаниқлик ортган эди.

Трамп маъмурияти томонидан жорий этилган божлар — бу чет элдан маҳсулот олиб кирувчи корхоналарга солинган солиқлар — инфляция хавфини кучайтирди ва инвесторларни олтин каби хавфсиз активларга йўналтирди. Трамп январда Оқ уйга қайтганидан бери Хитойга 145% бож солиқлари жорий этди, Хитой эса жавоб тариқасида АҚШ маҳсулотларига 125% бож солди. Шунингдек, АҚШнинг бошқа кўплаб давлатларга нисбатан кенг кўламли божлар жорий этиладими-йўқми — бу ҳам ҳозирча ноаниқ. Ҳукумат бу чораларни 90 кунга тўхтатиб қўйган.

Трамп маъмуриятининг айтишича, ушбу чоралар ишлаб чиқаришни АҚШга қайтариб, америкалик ишчилар учун иш ўринлари яратади ва миллиардлаб долларлик солиқ тушумларини таъминлайди.