Саройда қиролга “кўз-қулоқ бўлган” ходимга 64 минг доллар тўланади

Буюк Британия қиролининг Букингем саройида баъзан бўш иш ўринлари пайдо бўлади. Бу сафар ноодатий “барқарорлик менежери” лавозими жорий этилди. Бу ҳақда “Tengrinews” нашри хабар берди. 

Лавозим оддий эшитилсада, унга катта вазифа ишониб топширилади. Ушбу аъённинг вазифаси қиролнинг углеродни қандай камайтиришини диққат билан кузатишдир. 

Гап шундаки, Буюк Британия ҳукумати углеродни ноль даражага етказиш учун мунтазам курашади. 74 ёшли Чарльз III ҳатто экологик кун тартибига катта эътибор қаратгани учун “Иқлим қироли” лақабини олган. Шунингдек, у ўсимликлар билан мулоқот қилишни ва дарахтларга қўл силкитишни яхши кўради.

“Қироллик уйи ўз фаолиятида экологик барқарорликни биринчи ўринга қўяди. Биз карбонат ангидрид чиқиндилари ва энергия сарфига қарши чоралар кўриш орқали сайёрамизга бўлган таъсиримизни камайтиришга интиламиз”, деб ёзилган иш тавсифида.

Букингем саройидаги маошлар жуда катта. Хусусан, сарой янги менежерга йилига 50 минг фунт стерлинг (64 минг АҚШ доллари) тўлашни режалаштирмоқда. Бу оддий иш ҳақидан бир мунча юқори. Чунки Буюк Британияда ўртача иш ҳақи йилига 33 минг фунт (тақрибан 42 минг доллар)ни ташкил қилади.