Рузвельтнинг сирли тангаси 500 минг долларга сотилди

АҚШнинг Огайо штатида 1970 йилларнинг охиридан бери қаерда эканлиги сир бўлиб қолаётган жуда кам учрайдиган танга 500 минг доллардан сал кўпроққа сотилди. Бу ҳақда “Associated Press News” хабар берди.

Ушбу ноёб танга 1975 йилда Сан-Францискодаги АҚШ зарбхонаси томонидан зарб қилинган. Тангада Қўшма Штаталарнинг 1933-1945 йиллардаги 32-президенти Франклин Делано Рузвельт тасвирланган ва у ўзига хос “S” зарб белгисисиз мавжуд бўлган иккита тангадан биридир.

40 йилдан ортиқ вақт давомида банк кассасида сақланган тарихий нумизматика ашёси Огайо штати яшовчи уч опа-сингилга акаси вафотидан сўнг мерос қолган. Калифорниянинг Ирвайн шаҳрида жойлашган “Great Collections” аукцион уйи раҳбари Иэн Расселлнинг сўзларига кўра, танга 27 октябрь куни якунланган онлайн кимошди савдосида 506 минг 250 долларга сотилган.

Расселлнинг сўзларига кўра, опа-сингиллар унга ўша икки тангадан бирини мерос қилиб олганини айтган, лекин уларнинг акаси ва онаси 1978 йилда топилган биринчи тангани 18 минг 200 долларга сотиб олган, бу бугунги кунда тахминан 90 минг долларни ташкил қилади.

Эслатиб ўтамиз, аввалроқ “Титаник” кемаси йўловчиларидан бири – америкалик миллионер Жон Жейкоб Асторга тегишли олтин Waltham чўнтак соати кимошди савдосида рекорд даражадаги нархга – 1,175 миллион фунт стерлингга (1,48 миллион доллар) сотилганди. Энг юқори нарх таклифи АҚШдан келган коллектор бўлди, унинг номи ошкор этилмаган. Англиянинг Уилшир шаҳридаги аукцион уйига кўра, савдо Астор соатини кимошди савдосига қўйилган энг қиммат “Титаник” ёдгорликларига айлантиради. Қайд этилишича, бу унвон авваллари табиий офат пайтида чалинган скрипкага тегишли бўлган: бу чолғу асбоби 2013 йилда худди шу аукцион уйида 1,1 миллион фунт стерлингга сотилган.