Рус нефтига ҳужум: ЕИ давлатлари Россияга қарши янги санкцияларни келишиб олди

Европа Иттифоқи давлатларининг доимий вакиллари Россияга қарши янги, саккизинчи санкциялар пакети бўйича келишувга эришди. Бу ҳақда “Politico” кеча, 4 октябрь куни бўлиб ўтган учрашув якунлари бўйича пайдо бўлган резолюция лойиҳасига таяниб ёзмоқда.

Пакет доирасида Россия нефтига ҳам нарх чегараси жорий этилади. Нашрнинг ёзишича, ушбу чорадан хавотир билдирган Кипр, Греция ва Мальта (бу давлатларнинг танкерлари Россия нефтининг катта қисмини ташийди) маълум имтиёзларга эга бўлган.

Шунингдек, янги пакет Россия пўлат ва мудофаа саноатига чекловлар, Европа Иттифоқи фуқароларига Россия давлат компаниялари директорлар кенгашида лавозим эгаллашни тақиқлаш, “Президент [Владимир] Путинга ҳарбий ҳаракатларда ёрдам берганларга қарши янги шахсий санкцияларни ўз ичига олади”.

Венгрия Ташқи ишлар вазири Петер Сийярто, ўз навбатида, Будапешт муҳокамалар чоғида Россия нефти нархининг юқори чегараси қувурлар орқали етказиб бериладиган “қора олтин”га қўлланилмаслиги, янги санкциялар эса атом энергиясига таъсир қилмаслигини таъминлаганини айтди. Негаки, бундай чеклов Венгрияга “Пакш” атом электр станцияси учун янги энергия блокларини қуришни қийинлаштириши мумкин эди.

Қарорнинг якуний таҳрири 5 октябрь куни тасдиқланиши кутилмоқда.

Сентябрь ойи бошида G7 давлатлари 5 декабрдан бошлаб Россия нефтига нархларнинг юқори чегарасини жорий этиш қарорини эълон қилди.

Декабрдан бошлаб эмбарго кучга киради, унга кўра Россия нефтини денгиз орқали Европа Иттифоқи мамлакатларига олиб кириш бутунлай тақиқланади. Яна икки ой ичида бу тақиқ автоматик равишда нефть маҳсулотларига ҳам татбиқ этилади.