Руминия Президенти истеъфога чиқди

Руминия Президенти Клаус Йоханнис истеъфога чиқди. Бу ҳақда у бугун, 10 февраль куни Бухарестда маълум қилди.

“Руминия ва Руминия фуқароларини инқироздан қутқариш учун мен ўз лавозимимни тарк этаман”, деди Йоханнис.

Қарор ўта ўнгчи парламент кучлари томонидан унга импичмент эълон қилиш таҳдиди билан бир пайтда қабул қилинди.

2024 йил 6 декабрда Руминия Конституциявий суди президентлик сайловларида биринчи тур овоз бериш натижаларини ҳақиқий эмас деб топди. Натижаларга кўра, ўта ўнгчи россияпараст сиёсатчи Калин Жоржску 23% овоз тўплади ва президентлик учун иккинчи турда ўнг марказчи Элена Ласкони билан курашмоқчи эди. Натижаларни бекор қилиш қарори Руминия Президенти идораси сайловга Жоржску фойдасига таъсир кўрсатганини тасдиқловчи разведка маълумотлари борлигини маълум қилганидан кейин қабул қилинган. Улар орасида TikTok видео платформасида “манипуляция қилинган” инфлюенсерлар билан партизан кампанияси, шунингдек, 85 000 дан ортиқ киберҳужумлар ҳақида гапирди.

Разведка маълумотларига кўра, Руминия Россиянинг “тажовузкор” гибрид фаолияти, жумладан киберҳужумлар, маълумотларнинг сизиб чиқиши ва саботажнинг нишони ҳисобланади.

Европа Иттифоқи тахмин қилинган манипуляциялар юзасидан тергов бошлади.

Йоханниснинг иккинчи ва охирги муддати 2024 йил 21 декабрда тугади. Бироқ сиёсатчи ўз ўрнида ворис сайланмагунча ўз лавозимида қолишни исташини айтди.

Январь ойида парламентдаги 35 фоизга яқин ўринларни назорат қилувчи учта ўта ўнгчи мухолифат партияси Йоханнисга импичмент эълон қилиш таклифи билан чиқди. Бухарестдаги намойишчилар ҳам бир неча бор Президент истеъфосини талаб қилган.

Руминиянинг ҳукмрон коалицияси 8 январь куни 4 май куни президентлик сайловларида такрорий овоз беришни ўтказишга келишиб олди. Мумкин бўлган иккинчи тур 18 майга белгиланган.

Руминияда Президент асосан вакиллик функцияларини бажаради. Шу билан бирга, у ҳукумат раҳбарини тайинлаш ваколатига эга. Йоханнис 2014 йилдан буён давлат раҳбари лавозимида ишлаб келмоқда.