Рубио Путинни “жиноятчи” деб аташдан бош тортди

АҚШ Давлат котиби Марко Рубио Россия Президенти Владимир Путинни “жиноятчи” деб аташдан бош тортди. Бу ҳодиса кеча, 21 май куни АҚШ Конгресси Вакиллар палатасининг Ташқи ишлар бўйича қўмитаси эшитувларида содир бўлди.

Маълум қилинишича, Вакиллар палатасининг ташқи ишлар бўйича қўмитасида ўтказилган эшитувида сенатор Билл Китинг (демократ) Марко Рубиодан Владимир Путинни “ҳарбий жиноятчи” деб ҳисоблайдими, деб сўраган. Бу билан сенатор Рубионинг бир неча йил аввал айтган баёнотини эслатган.

“Украинадаги уруш пайтида жиноятлар содир этилган, бу учун жавобгарлик бўлади. Аммо ҳозирги асосий мақсадимиз – бу урушни тугатиш”, дея гапни олиб қочган Марко Рубио.

Шундан сўнг Билл Китинг АҚШ Давлат котибини изчил позицияга эга эмасликда айблаган.

“Бу ахир оддий. Путин ҳарбий жиноятчими? АҚШ музокаралар олиб бораётган Владимир Путин ҳарбий жиноятчими?” дея яна қайта сўрашда давом этган Китинг.

Рубио эса ҳозир бу масала ҳал қилинмаслигини таъкидлаган.

“Мен сизга урушни тугатишга уринаётганимизни айтяпман. Ҳарбий жиноятлар содир этилган. Бу – аниқ. Бунга ким жавоб беради? Бунинг вақти ва жойи келади. Аммо ҳозирги вазифа – урушни якунлаш”, дея такрорлаган АҚШ Давлат котиби.

Маълумот учун, 2022 йил Россия ва Украина ўртасидаги можаро бошланган пайтда Марко Рубио Флорида штатидан сенатор бўлган ва Сенатнинг разведка бўйича қўмитаси раисининг ўринбосари лавозимида ишлаган. У АҚШ Украинанинг ёнида туриши шартлигини таъкидлаган ва Владимир Путинъни “ҳарбий жиноятчи” деб атаган.

Худди шундай баёнотларни собиқ АҚШ президенти Жо Байден ҳам қилган.

Бироқ 2025 йил февраль ойига келиб, Рубио Давлат котиби лавозимини эгаллаганидан сўнг, Россия Президентига нисбатан илгари айтган сўзларини такрорламаган.

Эслатиб ўтамиз, аввалроқ АҚШ Давлат котиби Марко Рубио “Fox News”га берган интервьюсида Украинада тинчлик жараёни АҚШ ва Россия Президентлари Дональд Трамп ва Владимир Путин учрашувидан кейингина бошланиши ҳақида айтган эди.