“Руҳан чарчадим”. Коутиньо жамоасидан кетди

“Ливерпуль” ва “Барселона” жамоалари собиқ футболчиси Филипе Коутиньо “Васко да Гама”дан кетишини эълон қилди. Бу ҳақда 33 ёшли ярим ҳимоячи ўзининг Instagram саҳифасида маълум қилди.

“Мен ҳеч қачон мухлисларга, жамоадошларимга ёки “Васко”га ҳурматсизлик қилмаганман. Ўйнаган ҳеч бир жамоамда бундай қилмаганман. Мени биладиганлар буни тасдиқлашади.

Кийиниш хонасига кетаётганимда клубдаги циклим тугаганини ва руҳий саломатлигимни биринчи ўринга қўйишим кераклигини англадим. Бу жуда оғриқли эди. Бутунлай руҳий жиҳатдан чарчаган эдим. Юрагим оғир бўлди ва бир қадам орқага чекиниб, “Васко”даги фаолиятимни якунлаш вақти келганини тушундим”, дейди Коутиньо.

Маълум бўлишича, Коутиньо жорий йилнинг 15 февраль куни “Волта-Редонда”га қарши бўлиб ўтган учрашувнинг биринчи бўлимидан сўнг алмаштирилган. Ўйинда баъзи мухлислар уни ҳуштакбозлик билан қарши олган. Футболчи иккинчи бўлимда захира ўриндиғига қайтмаган. 

Ҳозирча “Васко да Гама” футболчининг кетишини расмий тасдиқламади.

Маълумот учун, Филипе Коутиньо 2013–2018 йиллар давомида Англиянинг “Ливерпул” жамоаси шарафини ҳимоя қилган. 2018 йилдан 2022 йилгача эса у “Барселона” таркибида тўп сурган.