Россия ЕЧЛ финалига ажратган маблағини нимага сарфлаши маълум бўлди

Россиянинг Санкт-Петербург шаҳри вице-губернатори Борис Пиотровский Европа Чемпионлар лигаси финали учун ажратилган пуллар қандай мақсадларда сарфланишини маълум қилди. 

“Бугунги кунда Санкт-Петербург йирик халқаро тадбирларни ўтказувчи тимсолий марказлардан бири бўлиб, бизда барча зарур ресурслар ва инфратузилма мавжуд. Бу эса хорижлик ҳамкасбларимизга яхши маълум, шунинг учун бундай қарор сиёсий тарафкашлик эканлиги кўриниб турибди. Аслида спорт сиёсатдан ташқарида эканлиги ва у бўлиниши эмас, бирлашиши кераклиги қайта-қайта таъкидланган.

Яна шуни айтмоқчиманки, биз Чемпионлар лигаси финал ўйинига тайёргарлик кўриш ва ўтказиш учун сарфлашни режалаштирган маблағимиз болалар спорт мактабларини ривожлантиришга йўналтирилади”, деб ёзди Пиотровский ўзининг Telegram каналида.

Эслатиб ўтамиз, Россиянинг Украинага ҳужум қилиши фонида ЕЧЛ финал баҳси Санкт-Петербургдан Парижга кўчирилганди.

Шахбоз Қаҳҳоров