Россия Украинага уруш олиб келиб, нима қилганини ҳис қилиши керак – Зеленский

Украина Президенти Владимир Зеленский Украинанинг уч кун олдин бошланган Россиянинг Курск вилоятига ҳужумларига илк марта ишора қилди. Бу ҳақда у Telegram-каналида ёзди.

“Россия бизнинг еримизга  уруш олиб келиб, нима қилганини ҳис қилиши керак. Мен Украина позицияларини ҳимоя қилишни ва мудофаа вазифаларимизнинг бажарилишини таъминлайдиган ҳар бир жангчи, аскар ва қўмондондан миннатдорман. Украиналиклар ўз мақсадларига қандай эришишни билишади”, дейди Зеленский.

Мутахассисларнинг таъкидлашича, ҳужумнинг мумкин бўлган мақсадларига Россия Европага газ ўтказувчи Суджа ёқилғи қуйиш шохобчасини вайрон этиш, Россия қўмондонлиги эътиборини Донбассдан чалғитишга уриниш, Россия ўз кучларини Украинанинг Харков вилоятига етказиб берадиган темирйўлни йўқ қилиш ва Украина армиясини мустаҳкамлаш кабилар киради.

Россия гвардияси корпусининг хабар беришича, Россия ҳукумати жанглар яқинида жойлашган Курск атом электр станциясининг тақдиридан қўрқади ва унинг хавфсизлиги кучайтирилган.

Курск вилояти ҳокимияти Украина ҳужумида беш нафар фуқаро, жумладан, фельдшер, тез ёрдам ҳайдовчиси ва 24 ёшли ҳомиладор аёл ҳалок бўлганини ва олти нафар бола жароҳатланганини айтган. Россия Президенти Владимир Путин Украинанинг ҳаракатларини катта провокация ва турли хил қуроллар, шу жумладан, ракеталар билан фуқаролик объектлари, турар-жой бинолари ва тез ёрдам машиналарига қарши ҳужум, деб атади.

Украина жавобгарликни ўз зиммасига олмади. Бироқ бир нечта юқори мартабали амалдорлар билвосита Киевнинг иштирокини тасдиқлади.

Зебо Туробжонова