Россия Тожикистондан желатин импортини тақиқлади

Росселхознадзор Тожикистон ветеринария хизматидан бугун, 1 июлдан бошлаб озиқ-овқат мол гўшти желатинига сертификатлар беришни тўхтатиб қўйишни сўради. Бу маҳсулоти Россияга жўнатиладиган барча тожик ишлаб чиқарувчиларига тегишли. Бу ҳақда “Asia Plus” хабар берди.

Бунга Росселхознадзор мутахассислари томонидан 18-20 июнь кунлари Тилло Жело заводида ўтказилган текширув сабаб бўлган. Шунингдек, улар Тожикистон озиқ-овқат хавфсизлиги қўмитаси қошидаги Миллий диагностика марказига ҳам борган.

Текширув шуни кўрсатдики, завод ва ветеринария хизмати маҳсулотлар сифати ва хавфсизлигини назорат қилмайди. Баъзи кўрсаткичлар ЕОИИ стандартларига мос келмайди.

“Ўтказилган ишларнинг таҳлили республика ветеринария хизмати ва корхона томонидан ушбу маҳсулотни ишлаб чиқариш ва сотиш бўйича назорат йўқлигини кўрсатди. Экспорт қилинадиган маҳсулотнинг сифат ва хавфсизлик кўрсаткичлари амалда назорат қилинмайди ва бир қатор кўрсаткичлар ЕОИИ меъёрий ҳужжатларида белгиланган стандарт қийматларга мос келмайди”, дея таъкидлайди Росселхознадзор.

Бундан ташқари, аниқланишича, корхонада олинган хомашё ва фойдаланилган ингредиентларни кузатиш тизими мавжуд эмас; ҳайвонот хомашёсини етказиб берувчиларни ва уларнинг келиб чиқиш жойини жойида аниқлаш имкони йўқ.

Шунингдек, ишлаб чиқариш объектларининг санитария ҳолати қониқарсизлиги қайд этилиб, тайёр маҳсулотларни сақлаш шароитлари ва ҳарорат шароитлари бузилиши аниқланди.

Божхона хизмати маълумотларига кўра, 2025 йилнинг дастлабки беш ойида Тожикистондан қиймати жами 943,4 минг доллардан ортиқ бўлган 183,4 тонна желатин экспорт қилинган.

Ўтган йили хавфли касаллик – нодуляр дерматит авж олгани сабабли Россия Тожикистондан ҳайвонлар ва маҳсулотлар олиб киришни вақтинча тақиқлаган эди. Тақиқ сигирлар, буқалар ва касал бўлиши мумкин бўлган бошқа ҳайвонларни ўз ичига олади.

Шунингдек, гўшт, сут, тери, ем-хашак, ов кубоги ва чорва молларини ташиш учун асбоб-ускуналар дезинфекция қилинмаган бўлса, олиб кириш тақиқланади. Бундай ҳайвонларни Россия орқали транзит қилиш ҳам тақиқланган.