Россия КХДРга қурол ва аскар эвазига нефть етказиб берди

Россия 2024 йил мартидан бери Шимолий Кореяга 1 миллион баррель, яъни 56 минг тоннадан ортиқ нефть жўнатди. Бу ҳақда Британиянинг Open Source Center тадқиқот маркази сунъий йўлдош тасвирларига таяниб, BBС хабар берди.

Етакчи экспертлар ва Буюк Британия Ташқи ишлар вазири Дэвид Лэмми Москва бу нефть билан Пхеньянга Шимолий Кореянинг Украинага қарши курашда Россияга ёрдам бериш учун ишлатаётган қуроллари ва аскарлари учун тўлов қилаётганига ишончи комил. Таҳлилчиларга кўра, сўнгги саккиз ой ичида Шимолий Кореянинг ўндан ортиқ танкерлари Узоқ Шарқдаги Россия нефть терминали ва Шимолий Корея портлари ўртасида 43 марта қатновни амалга оширган. Сунъий йўлдошдан олинган суратлар шуни кўрсатадики, бу танкерлар Россияга бўш кетган ва юкланган ҳолда қайтиб келган.

Open Source Center томонидан ҳужжатлаштирилган биринчи парвоз Шимолий Корея ўқ-дорилари Россияга жўнатилгани ҳақидаги илк хабарлардан етти ой ўтиб, жорий йилнинг 7 март куни амалга оширилган. Охирги парвоз 5 ноябрь куни қайд этилган, ўшанда у Шимолий Корея қўшинларининг Курск вилоятига жўнатилгани ҳақида аллақачон маълум бўлган эди.

“Бу доимий нефть оқими Шимолий Кореяга санкциялар жорий этилганидан бери кузатилмаган барқарорлик даражасини бермоқда”, деган Очиқ манбалар марказининг катта таҳлилчиси Жо Бёрн.

Шимолий Корея ядро қуролини ишлаб чиққани учун халқаро санкциялар остида. Мамлакатга йилига 500 минг баррелдан ортиқ нефть сотиб олиш тақиқланган. Шу билан бирга, 1 миллион баррель ёки 56 минг тонна Россия учун аҳамиятсиз ҳажм бўлиб, расмий маълумотларга кўра, бир кунда деярли ўн баробар кўп ишлаб чиқарилади. Британиянинг “The Times” газетасига кўра, Шимолий Корея Россияга йилига 3 миллионга яқин снаряд етказиб беради, бу Россия армияси Украинага қарши урушда ишлатадиган ўқ-дориларнинг ярмини ташкил этади.

Эслатиб ўтамиз, аввалроқ Россия ва Шимолий Корея ўртасида Пхеньянга молиявий ва озиқ-овқат инқирозини енгишга ёрдам берувчи битим имзоланганди. Унга кўра, Россия КХДРга қўллаб-қувватлагани учун компенсация сифатида катта миқдорда гуруч етказиб беради. КХДР йилига тахминан тўрт миллион тонна дон етиштиради, лекин бу аҳолини таъминлаш учун етарли эмас. Чунки, мамлакатда йиллик эҳтиёж камида беш миллион тоннани ташкил қилади. Агар Россия 600-700 минг тонна гуруч таклиф қилса, бу Шимолий Кореянинг йиллик эҳтиёжининг бир қисмини қоплашга етади.