Россия Беларусга оғир техникалардан иборат дивизия киритди

Бугун, 29 январга ўтар кечаси Россия Иттифоқ давлатининг жавоб кучларини текшириш доирасида қуролли кучлар бўлинмаларини Беларусга қайта жойлаштиришни давом эттирмоқда. Бу ҳақда мамлакат Мудофаа вазирлиги хабар берган. 

“Яна бир темир йўл эшалони Шарқий ҳарбий округнинг “Панцирь-С” зенит-ракета тўқнашув бўлинмасини тушириш станциясига етказди”, дейилади вазирлик хабарида. 

Мудофаа вазирлиги томонидан эълон қилинган видеороликдан маълум бўлишича, дивизия 12 та жанговар техникани ўз ичига олади, уларнинг ҳар бири 12 та зенит-ракеталарни ташиш имкониятига эга. 

Юкларни туширгандан сўнг, Россия ҳарбий хизматчилари жойлаштириш ҳудудига юради ва Беларусь ҳамда Россиянинг ягона минтақавий ҳаво ҳужумидан мудофаа тизими таркибида жанговар тайёргарлик кўришни бошлайди.

Қайд этилишича, Иттифоқ давлатининг реакция кучларининг синови икки босқичда ўтказилади. Биринчиси 9 февралгача давом этади. Шу вақт ичида Беларусь ҳудудида қўшинларни жойлаштириш, уларни гуруҳларга ажратиш, давлат ва ҳарбий объектларни, шунингдек Иттифоқнинг ҳаво чегара ҳимоясини ташкил этиш, ҳаво ҳужумидан мудофаа кучларининг навбатчиликка тайёрлигини текшириш режалаштирилган. 

Иккинчи босқич 10-20-февраль кунлари бўлиб, унда “Иттифоқчилар қарори – 2022” қўшма машғулотлари ўтказилади. Россия ва Беларусь ҳарбийлари ташқи тажовузни бостириш ва терроризмга қарши курашиш, хусусан, қурол-яроғ ва ўқ-дориларни етказиб бериш каналларини тўсиб қўйиш, шунингдек ноқонуний қуролли тузилмалар, саботаж-разведка гуруҳларини йўқ қилиш вазифаларини ишлаб чиқади.

Аввалроқ, Россия Президенти Владимир Путин Санк-Петербургда ўтган Беларусь раҳбари билан учрашув чоғида, 2022 йил февраль-марть ойларида Россия-Беларусь ҳарбий машғулотлари ўтказилиши ҳақида маълум қилганди.

Маълумот учун, сўнгги пайтларда Ғарб матбуоти Россия Украина билан чегарадош ҳудудларда қўшин тўплаётгани, бу билан у ҳужумга тайёрланаётгани ҳақида бонг уриб келмоқда. Аммо Кремль матбуот котиби Дмитрий Песковга кўра, Россия ўз ҳудуди бўйлаб ҳар қандай ҳарбий ҳаракатларни амалга ошириш ҳуқуқига эга, бу ҳеч кимнинг хавотирга тушишига асос бўла олмайди.

Шунингдек, Россия 2021 йилнинг 17 декабрь куни АҚШ ва НАТОга бир қанча талаблар қўйганди. У альянсдан янги аъзоларни, биринчи навбатда Украинани қабул қилишдан бош тортишни, шунингдек, илгари СССР таркибига кирган давлатлар ҳудудига ўз қўшинларини жойлаштирмасликни талаб қилган.