Россия агрессиясининг Марказий Осиёда ҳам такрорланмаслигига қандай кафолат бор?

Россия бу операцияни Марказий Осиёда қайта такрорлаши мумкин эмаслигига ишонч борми? Бу савол билан АҚШ Давлат котиби Энтони Блинкен кеча, 1 март Тошкентда ўтказилган матбуот анжуманида журналистларга юзланди. 

Блинкеннинг фикрича, Путин бир ёки икки йил ё бўлмаса уч йил ўтгач,  қуролланади ва яна ҳужум қилади. 

“Шундай экан, ўйлайманки, диққатимизни айнан шу нарсага қаратишимиз керак”, деган Блинкен.

У, шунингдек, расмий Москванинг музокараларга киришишига шубҳа билан қарашини билдирган.

“Агар Россия, Президент Путин, тажовузни тўхтатиш учун зарур бўлган мазмунли дипломатия билан шуғулланишга чин дилдан тайёр бўлса, албатта, биз биринчи бўлиб бу иш билан шуғулланар эдик. Аммо бунга ҳеч қандай далил йўқ. Аксинча, далиллар бошқа йўналишда. 

Шунчаки Президент Путиннинг сўзларини тингланг. Битта мисол келтирсак, у яқинда ва очиқчасига, агар Украина ўзи айтган “янги ҳудудий воқеликлар”ни тан олмас экан, яъни бошқача қилиб айтганда Россиянинг Украина ҳудудларини олиб қўйганини очиқчасига тан олмаса “биз гаплашмаймиз”, деб айтди. Бу, шубҳасиз, нафақат Украина ёки биз учун, балки бутун дунё мамлакатлари учун Россиянинг мақсади ҳақида ҳеч қандай савол қолдирмайди”, дейди АҚШ котиби.

Блинкен ҳар бир Марказий Осиё давлати ўзининг ҳудудий яхлитлиги, суверенитетини жуда қийин қўлга киритгани ва мустақиллик нима эканини яхши ҳис қилишини ва бу минтақада, албатта, акс-садо беришига ишонишини айтган.

“Асосий савол шуки, Россия ўзининг тажовузкорлигини тўхтатишга ва буни Бирлашган Миллатлар Ташкилоти Низомига ва айнан шу тамойилларга мос келадиган тарзда амалга оширишга чин дилдан тайёрми? Бутун дунё бўйлаб эшитган ва БМТ Бош Ассамблеясида 141 давлат томонидан қабул қилинган резолюцияда ўз аксини топган асосий нарса – бу тинчликка, лекин адолатли ва мустаҳкам тинчликка интилишдир. БМТ Низомининг ҳудудий яхлитлик, суверенитет ва мустақиллик тамойилларига мос келиши ва юқорида айтиб ўтганимдек, Россия бу операцияни қайта такрорлаши мумкин эмаслигига ишонч борми?” дея ўз саволини қайтарган Блинкен.

Унинг фикрича, бугун ҳеч ким Украина халқичалик тинчликка муштоқ эмас. Улар ҳар куни Россия агрессиясининг қурбони бўлмоқда. Уруш эса эртага, балки бугуноқ тугаши мумкин. Лекин буни Россия хоҳлаши керак.

“Энди биз ҳаммамиз оддий ҳақиқатни биламизки, агар Президент Путин шундай қарор қилса, уруш эртага тугаши мумкин – бугун тугаши мумкин. Урушни Путин бошлади, у буни тўхтата олади. Бу, бир қараганда, шунчалик оддий. Ва биз бу ҳақиқатни ҳеч қачон йўқотмаслигимиз керак. Бизнинг тажовузкоримиз ва қурбонимиз борлигини ҳеч ким эътибордан четда қолдирмаслиги керак ва бу иккиси ўртасида ҳар қандай тенглик, жумладан, тинчликка ким кўпроқ содиқ эканини таклиф қилиш, менимча, жуда нотўғри”, дея изоҳ берган Америка вакили.