Роналдунинг жароҳати ҳақида маълумот берилди

Кеча, 1 март куни Криштиану Роналду “Ал-Наср” сафида Саудия Арабистони чемпионатининг 24-турида “Ал-Файҳа”га қарши учрашувда жароҳат олиб, майдонни тарк этди. Ўйиндан сўнг  “Ал-Наср” бош мураббийи Жорже Жезуш Роналдунинг жароҳати ҳақида фикр билдирди.

Саудия чемпионатининг 24-турида Ал-Файҳага қарши ўйинда (3:1) Роналду дастлаб пенальтини голга айлантира олмади. Учрашувнинг 81-дақиқасида эса ўнг оёғидаги ноқулайлик сабабли майдонни тарк этди.

“У мушакларида оғриқ ҳис қилди. Иккинчи голни урганимиздан кейин таваккал қилмасликка қарор қилдим ва уни алмаштирдим. Тиббий штаб унинг ҳолатини баҳолайди, аммо ҳозирча гап шунчаки мушаклар чарчоғи ҳақида кетмоқда, холос”, дейди Жезуш.

Маълумотларга кўра, Роналдунинг тикланиши тахминан 3–5 кун атрофида бўлиши мумкин. Агар мушакда йиртилиш аниқланса, унда уни тикланиши учун 2 ҳафтагача ёки ундан кўпроқ вақт керак бўлади.

Маълумот учун, жорий мавсумда Роналду Саудия Арабистони Про-лигасида 21 та гол уриб, 2 та голли узатмани амалга оширди. “Ал-Наср” эса 24-турдан сўнг 61 очко билан мусобақа жадвалида пешқадамлик қилмоқда.