Роналдунинг трансфери Саудияга қандай фойда келтиради?

Саудия Арабистонининг “Ал-Наср” клуби бош директори Аҳмад Ал-Ҳамди португалиялик ҳужумчи Криштиану Роналду трансферининг Саудия Арабистонига таъсири ҳақида фикр билдирди.

“Криштиану Роналду билан шартнома имзоланиши тарихий келишув ва биз бошдан кечираётган буюк уйғониш даври ҳисобланади. Бу трансфер Саудия Арабистони имижига катта таъсир кўрсатади ва мамлакатимиз тараққиёти қай даражада эканлигини дунёга кўрсатади”, дейди Аҳмад Ал-Ҳамди. 

Роналду “Ал-Наср” сафида 2023 йил бошидан буён тўп суриб келмоқда. Футболчининг клуб билан шартномаси 2025 йилгача мўлжалланган. 38 ёшли форвард реклама шартномаларини ҳам ҳисоблаганда Саудия клубида йилига 200 миллион евро ишлаб топади. Мамлакат чемпионатининг жорий мавсумида Роналду 9 та ўйинда қатнашиб, 11 та гол урди ва 2 та голли узатмани амалга оширди.

Қайд этиш жоиз, Роналду маошининг атиги 10 фоизини “Ал-Наср”дан олади. Футболчи маошининг қолган қисми Саудия ҳукумати томонидан қопланади.