Роналду ва Жоржинанинг тўйи қачон ва қаерда ўтказилиши маълум бўлди – ОАВ

Беш карра “Олтин тўп” соҳиби Криштиану Роналду ва унинг севгилиси Жоржина Родригеснинг тўй маросими португалиялик юлдуз туғилиб ўсган Мадейра оролида бўлиб ўтади. Бу ҳақда “The Sun” нашри хабар берди.

Манбага кўра, жуфтликнинг тўй маросими жорий йилнинг 8 август кунига белгиланган. Маросим учун орол пойтахти Фуншал шаҳридаги соборни банд қилинган. Тантанали зиёфат эса беш юлдузли Savoy Palace меҳмонхонасида ўтказилиши кутилмоқда.

“Gossip” журналининг маълумотига кўра, тўйга собиқ UFC чемпиони Ҳабиб Нурмагомедов ҳамда ирландиялик жангчи Конор Макгрегор таклиф этилган. Шунингдек, маросим меҳмонлари орасида Рио Фердинанд, Винисиус Жуниор, Килиан Мбаппе, Родриго, актёр Вин Дизел, журналист Пирс Морган, қўшиқчилар Рианна, Женнифер Лопес, Дрейк, Трэвис Скотт ва блогер IShowSpeed ҳам бўлиши кутилмоқда.

Маълумот учун, Криштиану Роналду ва Жоржина Родригес 2016 йилдан буён бирга ҳаёт кечириб келмоқда. Улар 5 нафар фарзандни – Криштиану Жуниор, Ева ва Матео ҳамда қизи Алана Мартина ва Белла Эсмералдани тарбиялаб келмоқда. Жуфтлик 2025 йил августида муносабатларини расман фотиҳа билан мустаҳкамлаган эди.