Роналду ва Месси дунёнинг энг кучли футболчилари эмас – Гари Невилл

Ҳозирги кунда, Криштиану Роналду ва Лионель Месси дунёнинг энг кучли футболчилари эмас. Уларнинг ўйин савияси ҳануз юқори бўлса-да, мухлислар жамоаларида Месси ва Роналдуни кўришни истамайди, деб фикр билдирган собиқ футболчи ва “Sky Sports” эксперти Гари Невилл. 

“Кичик қаҳрамонликлар бўлиши мумкин. Лекин шубҳасиз, Роналду ва Месси ўз карьераларини якунлаш арафасида. Бу билан уларнинг кетиши мавсум охирида содир бўлади демоқчи эмасман. Роналду ва Мессининг яна 3-4 йил ўйнаш эҳтимоли бор. Чунки биз уларнинг жисмоний имкониятларини биламиз. Икки буюк футболчининг ўйин даражаси бир жойда қотиб қолгани ҳақида гапириш ғалати туйилиши мумкин. Сабаби, охирги йилларда Месси ва Роналдунинг тенгги йўқ эди. Бироқ, улар энди у қадар кучли эмаслигига шубҳа йўқ. Одамлардан севимли клуби қайси футболчи билан шартнома имзолашни хоҳлашларини сўрасангиз, жавоб сифатида ҳеч кимдан Месси ёки Роналду номини эшитмайсиз. Ҳозирги кунда, мухлислар Мбаппе, Холанд, Салоҳ, Левандовски каби футболчиларни клубларида ўйнашини исташади. Бу улар ҳали ҳам энг юқори савияда ўйнашса-да, аввалги даражасини йўқотаётганликларининг энг яққол мисолидир. Лионель ва Криштиану энди дунёнинг энг яхши футболчилари эмас”, деган “Манчестер Юнайтед”нинг собиқ ҳимоячиси.

Маълумот ўрнида, Роналду 2021 йилнинг ёзида “Ювентус”дан 15 миллион евро эвазига “Манчестер Юнайтед”га қайтган эди. Жорий мавсумда ҳужумчи АПЛнинг 23 та учрашувида майдонга тушиб, 9 та гол урди ва 3 та голли узатмани амалга оширди. 

34 ёшли аргентиналик футболчи Лионель Месси жорий мавсумда ПСЖ билан Лига 1 нинг 16 та ўйинида майдонга тушиб, 2 та гол ва 11 та голли узатмани амалга оширди. Будан ташқари, ҳужумчининг ҳисобида Чемпионлар лигасининг 6 та ўйинида 5 та гол ҳам бор.

Маъруф Абдумаликов