Рогозин умуртқасидан олинган ўқ парчасини Макронга кўрсатишни сўради

Украинанинг Донбасс минтақасида ярадор бўлган “Роскосмос”нинг собиқ раҳбари Рогозин умуртқасидан олинган ўқ парчасини Франция элчисига жўнатди. Бу ҳақда ТАСС ахборот агентлиги хабар берди.

Қайд этилишича, ўқ парчасига Дмитрий Рогозин хат илова қилган.

“Умуртқамдан чиқариб олинган ўқ парчасини Эммануэль Макронга топширишингизни сўрайман. Унга етказиб қўйингларки, ҳеч ким Франция, АҚШ, Буюк Британия, Германия ва НАТОга аъзо бошқа давлатларнинг Донбасдаги ҳарбий жиноятлари учун жазодан қутулиб қололмайди”, дея изоҳ қолдирган Рогозин.

Маълумот учун, Украина хавфсизлик кучлари 2022 йилнинг 21 декабрь куни кечқурун Донетскнинг Ленин туманига зарба берган эди. Шунингдек, улар Дмитрий Рогозин бошчилигидаги бир гуруҳ ҳарбий маслаҳатчилар яшайдиган меҳмонхонани ўққа тутган.

Оқибатда Россия космик тармоғини бошқарувчи “Роскосмос” корпорациясининг собиқ раҳбари Дмитрий Олегович Рогозин Донетскдаги меҳмонхонада умуртқасидан яраланиб, Ростов-на-Донудаги ҳарбий клиник шифохонага олиб кетилган эди. Шундан сўнг Рогозиннинг ўша пайтдаги ҳолатидан келиб чиқиб, шифокорлар уни мураккаб жарроҳлик амалиёти учун Москвага юбориш кераклигини айтган эди.

Озода Чориева