“Реал” ёзда катта трансферга тайёрланмоқда

“Реал Мадрид” ёзги трансфер ойнасида “Бавария” ярим ҳимоячиси Майкл Олисени сотиб олиш имкониятини кўриб чиқмоқда. Бу ҳақда “Bild” хабар берди.

Нашрга кўра, “қироллик клуби” президенти Флорентино Перес 24 ёшли футболчини жамоага олиб келиш учун жиддий ҳаракат қилмоқда. Бироқ, Мюнхен клуби ўз футболчиси билан хайрлашишни режалаштирмаяпти.

Олисенинг “Бавария” билан тузган шартномаси 2029 йилгача амал қилади ва унда сотиб олиш банди мавжуд эмас. Шу сабабли немис клуби уни сотиш бўйича таклифларни кўриб чиқишга мажбур эмас.

Шунингдек, “Ливерпуль” ҳам футболчига қизиқиш билдирмоқда. Англия клуби Олисени яқин келажакда “Энфилд”ни тарк этиши мумкин бўлган Муҳаммад Салоҳнинг ўрнини босувчи сифатида кўрмоқда.

Маълумот учун, Майкл Олисе 2024 йилда “Кристал Пелас”дан “Бавария”га 53 миллион евро эвазига ўтган. “Transfermarkt” маълумотларига кўра, футболчининг бозор қиймати 130 миллион еврога баҳоланган.